Agroónerkásip kesheninde jumys isteıtin Nıderlandy kompanııalarynyń basshylarynan quralǵan arnaıy delegasııa jumys saparymen Qazaqstanǵa keldi. Investorlar bir apta ishinde jańa ınvestısııalyq jobalardy iske asyrý boıynsha birqatar kommersııalyq qujatqa qol qoıýdy, sondaı-aq óńirlerdiń ınvestısııalyq múmkindikterimen tanysýdy josparlap otyr.
Delegasııa quramynda Food Ventures, KUBO, Van Der Hoeven, Certhon, Gakon, Dalsem syndy besinshi jáne altynshy býyndaǵy jylyjaı óndirisi salasyndaǵy iri kompanııalardyń basshylary bar. Sonymen qatar delegasııa quramyna zamanaýı aýyl sharýashylyǵy jabdyqtaryn shyǵarýmen aınalysatyn Hoogendoorn, Svensson, Gakon, Priva kompanııalarynyń basshylary kirgen. Budan bólek, ósimdikterdi bıologııalyq qorǵaý quraldaryn óndiretin Koppert Biological Systems, tuqym óndirý boıynsha kósh bastap turǵan Solynta, Rijk Zwaan jáne Dutch Greenhouse Delta, HVA International qaýymdastyqtarynyń basshylary bar.
Jumys sapary aıasynda eki eldiń bıznes ókilderiniń qatysýymen dóńgelek ústel ótti. Is-shara barysynda Nıderlandy kompanııalary zamanaýı agroónerkásip keshenin damytý, turaqty aýyl sharýashylyǵyna kóshý jáne ozyq sıfrly tehnologııalardy, sonyń ishinde jasandy ıntellekt pen Big Data tehnologııasyn paıdalana otyryp, jańa seleksııalyq sheshimderdi engizý týraly oı-pikirlerimen bólisti.
Qazaqstan Respýblıkasynyń Nıderlandy Koroldigindegi Elshisi Asqar Jumaǵalıevtyń aıtýynsha, saıasat salasynda da, ekonomıkalyq kooperasııada da eki el arasyndaǵy senimdi baılanystardyń ornaýynda ózara dostyq qarym-qatynastardyń mańyzy zor. Sapar aıasynda jalpy somasy 200 mln eýrony nemese 100 mlrd teńgeni quraıtyn 6 memorandýmǵa qol qoıyldy.
– KAZAKH INVEST ulttyq kompanııasy tarapynan Nıderlandy Koroldigindegi Qazaqstan Elshiligimen ınvestısııalyq yntymaqtastyqty damytý jáne nyǵaıtý boıynsha júıeli jumys júrgizilýde. Máselen, osy baǵyttaǵy negizgi draıverlerdiń qataryna energetıkalyq sektordan bólek, agroónerkásip sektory da qosylýy tıis. Nıderlandylyq kompanııalar bizge tikeleı ınvestısııa salý turǵysynan da, ozyq tehnologııalar transferti turǵysynan da, sondaı-aq memleket, bıznes, ǵylym jáne bilim berýdiń tabysty yntymaqtastyǵy turǵysynan da qyzyqty, – deıdi Kazakh invest UK AQ basqarma tóraǵasy Meıirjan Iýsýpov.
Nıderlandylyq delegasııa Almaty, Aqtóbe jáne Batys Qazaqstan oblystaryna barmaq. Onda jobalardy iske asyrýdyń mán-jaıyn talqylaý maqsatynda óńir basshylarymen jáne óńirlik bıznes qoǵamdastyqpen kezdesýler ótedi. Batys Qazaqstan oblysyna jumys sapary aıasynda nıderlandylyq Van Der Hoeven kompanııasynyń qatysýymen jylyjaı kesheniniń qurylysy boıynsha jańa jobanyń irgetasy qalanady. Jobaǵa salynatyn ınvestısııa kólemi 35 mln dollarǵa teń.
