La Lesher men Le-Je qalalaryn jalǵaǵan sońǵy taýly kezeńde qazaqstandyq veloshabandoz tamasha óner kórsetip, máre syzyǵyn 7-shi bolyp kesti. Bul nátıje oǵan «Krıterıým dıý Dofıne-2021» velojarysynyń vıse-chempıony atanýǵa jetkilikti boldy. Al buǵan deıin Parıj – Nıssa jáne Týre Daýn Ander jarystarynda eki márte jeńiske jetip, Shveısarııa týry, Katalonııa Výeltasy jáne Romandııa týrynda úzdik shyqqan aýstralııalyq Rıchı Port (Ineos Grenadiers) kópkúndiktiń jeńimpazy atandy. Ineos Grenadiers komandasynyń taǵy bir ókili brıtanııalyq Geraınt Tomas úzdik úshtikti túıindedi.
Sondaı-aq Astana-Premier Tech-tyń taǵy bir shabandozy – Ion Isagırre sońǵy eki sheshýshi taýly kezeńde Lýsenkoǵa qoldaý kórsetip, jalpy esepte 7-orynǵa ıe boldy. Al sońǵy bıik taýly kezeń Mark Padýnnyń (Bahrain Victorious) jeńisimen aıaqtaldy. Degenmen ýkraınalyq veloshabandoz qatarynan keıingi eki bıik taýly kezeńde jeńiske jetkenimen, jalpy esepte úzdikter qatarynan kórine almady. Ekinshi oryndy danııalyq veloshabandoz Ionas Vıngegor (Jumbo-Visma) ıelense, aýstralııalyq Patrık Konrad (Bora-Hansgrohe) úshinshi satyǵa taban tiredi.
«Jalpy esepte úzdikter qatarynan kóringenime qýanyshtymyn. Mundaı iri jarysty ekinshi bolyp aıaqtaý jáne kezeńderdiń birinde jeńiske jetý men úshin keremet nátıje dep aıta alamyn. Bul jarysta myqty sportshylar kóp boldy. Sondyqtan Rıchı Port jáne Geraınt Tomaspen qatar jeńis tuǵyryna kóterilý – erekshe jetistik. Komanda apta boıy jarysty joǵary deńgeıde ótkizdi. Maǵan kómek kórsetken jigitterdiń barlyǵyna, ásirese Ionǵa alǵysym sheksiz. Olar sońǵy eki kúnde maǵan úlken qoldaý kórsetti. Sonyń arqasynda jeńis tuǵyryna kóterildim. Endi «Týr de Fransqa» deıin biraz demalyp, qaıta babyma kelemin», dedi Alekseı Lýsenko.
