Álemdik reıtıngte 22-orynda turǵan E.Rybakına halyqaralyq jarystyń tórtinshi aınalymynda «Úlken dýlyǵa» týrnırleriniń 23 dúrkin jeńimpazy, qazirgi kezde reıtıngte 8-satyda turǵan 39 jastaǵy Serena Ýılıamspen kortqa shyqty. Bul eki tennısshiniń arasyndaǵy alǵashqy kezdesýi edi. Al amerıkalyq tennısshi buǵan deıin qazaqstandyq sportshylarmen 14 márte sheberlik baıqasyp, bárinde jeńiske jetken. Sóıtip Elena Rybakına Serena Ýılıamsty jeńgen tuńǵysh qazaqstandyq sportshy atandy.
Matchty qarqyndy bastaǵan qazaqstandyq tennısshi birinshi sette 4:1 esebimen alǵa shyqqan edi. Biraq keıinnen amerıkalyq sportshy eki geımde jeńiske jetip, esepti 4:3-ke deıin qysqartýǵa múmkindik alǵanymen, Rybakına keıingi eki geımde óz múmkindigin jibermedi – 6:3.
Ekinshi partııany otandasymyz breıkpen bastaǵanymen, tájirıbeli qarsylasy tarazy basyn teńestirip úlgerdi. Esep 3:3 bolǵan mezette qazaqstandyq tennısshi breık jasap, qaıta alǵa shyqty. Biraq óz geıminde qatelikke jol berdi – 4:4. Degenmen esep 5:5 bolǵanda, taǵy bir breıkke qol jetkizdi – 6:5. Sodan keıin birinshi matchbolyn paıdalana bildi – 7:5. Báseke 1 saǵat 18 mınýtta aıaqtalyp úlgerdi. Osylaısha qazaqstandyq tennısshi óz sporttyq jolynda alǵash ret Rolan Garros týrnıriniń shırek fınalyna shyǵyp otyr. Osy tabysy úshin Elena Rybakına WTA reıtıngindegi qorjynyna 430 upaı salsa, qaltasyn 255 500 eýroǵa qalyńdatty.
Endi jerlesimiz jartylaı fınalǵa shyǵý úshin álemniń 32-raketkasy, reseılik Anastasııa Pavlıýchenkovamen talasady. Ol tórtinshi aınalymda Belarýs ókili Vıktorııa Azarenkony 5:7, 6:3, 6:2 esebimen utty. Bir qyzyǵy, E.Rybakına A.Pavlıýchenkovamen birge Fransııa ashyq chempıonatynda juptyq synda da tabysty óner kórsetýde, olar úshinshi aınalymǵa ótken bolatyn.
