Úıeńki japyraqtar eliniń hokkeıshileri fınalda byltyrǵy álem birinshiliginiń jeńimpazy – Fınlıandııa quramasymen kezdesti. Matchta Sýomı eliniń ókilderi eki ret esepte alǵa shyqqanymen, kanadalyqtar eki retinde de tarazy basyn teńestirip, oıyn overtmaıǵa ulasty. Qosymsha ýaqytta baǵy janǵan Kanada hokkeıshileri 3:2 nátıjesimen qarsylastarynan jeńisti julyp aldy. Bir qyzyǵy, toptyq kezeńdegi oıynda Fınlıandııa dál osyndaı eseppen kanadalyqtardy qapy qaldyrǵan edi.
Al álem chempıonatynyń qola júldesin AQSh hokkeıshileri jeńip aldy. Úshinshi oryn úshin ótken básekede Amerıka quramasy Germanııany 6:1 esebimen utty. Aıta keteıik, Qazaqstan quramasy toptyq kezeńde Germanııa men Fınlıandııa hokkeıshilerin jeńip, AQSh pen Kanadadan jeńilgen bolatyn.
Álem chempıonaty óz máresine jetken soń Halyqaralyq hokkeı federasııasy (IIHF) quramalardyń jyl saıynǵy reıtıngin jańartty. Qazaqstan komandasy úsh saty joǵarylap, 13-orynǵa turaqtady. Al álem chempıony atanǵan Kanada reıtıngtiń kóshin bastady.
