Baıden Washington Post basylymynda jaryq kórgen saparǵa qatysty málimdemesinde «Erteńimiz belgisiz eleń-alań kezeńde ómir súrip jatqanymyz belgili. Bul – ǵasyrda bir kezdesetin pandemııa kezeńi. Sapar AQSh-tyń jańa josparyn júzege asyrýǵa, bul jolda seriktester, jaqtastarmen birlesýge, demokratııanyń kúshi jańa ǵasyrdyń tosyn syn-qaterlerin eńserýge jetetinin kórsetýge múmkindik ashady», dedi.
Prezıdent, eń aldymen, Brıtanııada ótetin G7 sammıtine qatysady. Odan keıin Brıýsselge NATO jınalysyna qatysýǵa attanady. Belgııa astanasynda Eýropa odaǵynyń kóshbasshylarymen kelissózder josparlanǵan. Bul is-shara barysynda AQSh pen Eýropa odaǵynyń syrtqy saıasaty talqylanady.
Ortalyq jáne Shyǵys Eýropa da AQSh-pen baılanysyn nyǵaıta túsýge múddeli. Germanııa da AQSh delegasııasyn óz jerinde qarsy alýǵa daıyn.
Fransııa qaýipsizdik máselesine kelgende AQSh jaqsy seriktes emes degen seniminen alystamaq raı tanytpady. «Besinshi respýblıka» úlken strategııalyq josparda Eýropa odaǵy jeke-dara da jaqsy nátıje kórsete alady degen oıda.
Baıden batyseýropalyq áriptesterimen aldaǵy apta ishinde kelisip úlgerýi qajet. О́ıtkeni Jenevada ótetin konferensııa kezinde Reseı prezıdenti Vladımır Pýtınmen kelissóz josparlanǵan. Baıden sonymen qatar Túrkııa prezıdenti Rejep Taıyp Erdoǵanmen kezdesý ótkizýi kerek. Bul jıyndardyń talassyz ótpeýi múmkin emes, deıdi sarapshylar. О́ıtkeni taraptar arasynda tartysty máseleler kóp.
Negizi, bul sapardan AQSh jaǵy naqty nátıjege qaraǵanda kelissóz ben áriptestikke kirisýdi kútip otyr. Baıden bul saparynda AQSh-tyń syrtqy saıasatynyń baǵyty ózgergenin, buǵan deıingi prezıdent Donald Tramp týǵyzǵan teris kózqarasty ózgertýge tyryspaq.
