Aıta ketý kerek, Qazaqstanda Scopus bazasyna kiretin 6 jýrnal bolsa, onyń 3-in Eýrazııa ulttyq ýnıversıteti basyp shyǵarady. Bul Matematıkalyq jáne kompıýterlik qosymshalardyń Eýrazııalyq jýrnaly, Eýrazııalyq matematıkalyq jýrnal jáne Eýrazııalyq fızıka jáne fýnksııalyq materıaldar jýrnaly.
Eýrazııalyq fızıka jáne fýnksııalyq materıaldar jýrnaly 2017 jyldan beri jaryq kórip keledi. Jýrnaldyń teń quryltaıshylary – «Birikken ıadrolyq zertteýler ınstıtýty» halyqaralyq úkimetaralyq uıymy (Dýbna q., Reseı) jáne «Qazaqstannyń fızıka-tehnıkalyq qoǵamy». Munda ıadrolyq fızıka, joǵary energııa fızıkasy, balamaly energetıka salasyndaǵy ǵylymı teorııalyq jáne eksperımenttik zertteýlerdiń nátıjeleri, energetıkalyq sektordyń qorshaǵan ortaǵa áseri, fýnksııalyq materıaldar men ǵylymdy qajetsinetin tehnologııalar týraly aqparat jarııalanady.
Redaksııalyq alqa quramy Qazaqstan, Reseı, Belarýs, AQSh, Fransııa, Japonııa, Fınlıandııa, Ýkraına, Shvesııa, Italııa, О́zbekstan jáne Anglııanyń belgili ǵalymdarynan, sondaı-aq CERN (Iаdrolyq zertteýler jónindegi eýropalyq uıym) jáne BIаZI (Birikken ıadrolyq zertteýler ınstıtýty, Dýbna qalasy, Reseı) álemdik deńgeıdegi halyqaralyq ǵylymı uıymdardyń ókilderinen turady. Sonymen qatar jýrnalda jarııalanatyn maqala avtorlarynyń 50%-dan astamy – sheteldik ǵalymdar.
Ǵylymı maqalalar muqııat iriktelip, tek aǵylshyn tilinde shyǵarylady.
Eýrazııalyq fızıka jáne fýnksııalyq materıaldar jýrnaly Scopus-pen qatar basqa da belgili halyqaralyq ǵylymı metrıkalyq derekqorlarda ındeksteledi: Index Copernicus International Ltd Poland, Cross Ref (World), Google Scholar, Scilit (Basel, Switzerland), Research Bib (World), Ulrichs web, Cite Factor, DOAJ, RINS (e-library).
Jýrnalda jarııalanatyn maqalalardy joǵary bilikti mamandar irikteıdi. Bul L.N. Gýmılev atyndaǵy Eýrazııa ulttyq ýnıversıtetiniń Halyqaralyq ǵylymı jáne baspa bedelin kóterýge, ásirese ýnıversıtettiń 25 jyldyq mereıtoıyna baılanysty laıyqty úles qosady. Ǵylymı jýrnal týraly tolyq aqparatty basylym saıtynan alýǵa bolady: www.ephys.kz.
