Nur-Sultan, Pavlodar jáne Taraz qalalaryndaǵy mektepter men lıseılerdiń 8 oqýshysy bilim báıgesinde elimizdiń namysyn qorǵady.
Bilim jáne ǵylym mınıstri Ashat Aımaǵambetov óziniń Facebook paraqshasynda ozat oqýshylardy jeńisimen quttyqtady. Mınıstr júldegerlerge jańa bıikterdi baǵyndyrý jolynda sáttilik tiledi.
– Jaqynda oqýshylar arasyndaǵy respýblıkalyq olımpıada óz máresine jetti. Oǵan elimizdiń 1 500-den asa daryndy oqýshysy qatysty. Bul – muǵalimderdiń, balalar men ata-analardyń orasan zor eńbeginiń nátıjesi. Biz balalarymyzdyń jeńisteri men jetistikterge jetýdegi ata-analardyń rólin sırek atap ótemiz. Alaıda is júzinde ata-ana qoldaýymen oqýshy aıtarlyqtaı jetistikterge jetip jatady. Sondyqtan biz respýblıkalyq olımpıadaǵa qatysqan 1 500 oqýshynyń ata-analaryna alǵys hat joldadyq. Aıtpaqshy, oqýshylarymyz halyqaralyq deńgeıdegi jetistikterimen de qýantyp jatyr. Qazaqstandyq oqýshylar Azııa olımpıadasynda bir altyn jáne úsh qola medal jeńip aldy. Qatysýshylardy jeńisterimen quttyqtaımyn! Jetkinshekterimiz bolashaqta bıik belesterdi baǵyndyrady degen senim bar. Osy rette tálimger ustazdarǵa shákirtteriniń kórsetken jaqsy nátıjeleri men qosqan úlesteri úshin alǵys aıtamyn, – dedi A.Aımaǵambetov.
Jarysqa qatysqan oqýshylardy tájirıbeli pedagogter daıyndady. Solardyń biri Súleımen Demırel ýnıversıtetiniń PhD doktory, professor Samat Maqsutuly bul olımpıadanyń basqa jarystardan erekshe ótkenin jetkizdi.
– Jalpy jarys onlaın formatta ótti. Aldyńǵy jyly Taıvanda oflaın formatta ótýi kerek edi. Biraq karantınge baılanysty ózgertilip, shegerildi. Oqýshylardy jetistikterine qarap, buryn jarystarǵa qatysyp, júldeli oryndardy ıelengen úzdikterin tańdap aldyq. Bul Azııalyq olımpıada bolǵandyqtan, kil myqtylar qatysady. Qytaı, Sıngapýr, Taıvan memleketinen kóptegen oqýshy baq synady. Bizdiń de jarysqa qatysqan barlyq oqýshylarymyz myqty boldy. Olar komanda quramynda emes, árqaısysy jeke-jeke óz esepterin shyǵaryp, qatysty. Nátıjesinde qatysýshylardyń bireýi altyn medalǵa, úsheýi qola júldege jáne ekeýi marapatqa ıe boldy, – dedi S.Maqsutuly.
Jattyqtyrýshy-muǵalimniń aıtýynsha, bul halyqaralyq deńgeıdegi doda bolǵandyqtan aǵylshyn tilinde ótti. Biraq tilden qıyndyqtar bolmaǵan. Sebebi tapsyrmalardyń bári – esep. Arasynda sóılem arqyly berilgen shartty esepter bolǵanda, oqýshylarǵa muǵalimder kómektesken.
– Jyl saıyn ótetin fızıka-matematıka olımpıadalary bar. Al sonyń eń tartystysy – Azııalyq olımpıada. Endi Azııa elderi ǵana emes, ózge de qurlyqtaǵy myqty memleketter qatysatyn jarysty kútip, daıyndalyp jatyrmyz. Oǵan osy olımpıadaǵa qatysqan 8 balanyń ishinen 5 oqýshyny tańdap alamyz, – dedi pedagog S.Maqsutuly.
Nurbıbi QADYR,
L.Gýmılev atyndaǵy Eýrazııa ulttyq ýnıversıtetiniń stýdenti
