Ádebıet • 14 Maýsym, 2021

«Uly dalanyń kóne saryndary» antologııasynyń II tomy jaryq kórdi

241 ret kórsetildi

M.O.Áýezov atyndaǵy Ádebıet jáne óner ınstıtýtynda «Uly dalanyń kóne saryndary» antologııasynyń ekinshi tomynyń tusaýy kesildi. Aıryqsha týyndy Elbasy N.Á.Nazarbaevtyń «Uly dalanyń jeti qyry» baǵdarlamasyndaǵy negizgi baǵyttardyń biri – «Dala folklory men mýzykasynyń myń jyly» jobasy aıasynda qanat qaǵyp otyr, dep habarlaıdy Egemen.kz

«Uly dalanyń kóne saryndary» antologııasynyń ekinshi tomyna engen qazaqtyń kóne aspaptary – shań qobyz, saz syrnaı, sybyzǵy, qobyz, sherter, úsh ishekti dombyra saryndary jáne aımaqtyq kúıshilik ónerindegi dombyraǵa arnalǵan halyq kúıleri men kásibı kúıshi-kompozıtorlardyń týyndylary, kúı sheberleriniń oryndaýshylyq nusqalary oqyrman úshin úlken olja bolǵanyn aıta ketken jón. Sýyryp-salmalyq ónerge negizdelgen qazaqtyń kúı murasynyń ishinen aspaptyq mýzykanyń 335 tańdamaly úlgisi iriktelip alynǵan.

Kúılerdiń notasy aýdıo materıaldarmen salystyrmaly túrde naqtylanyp, sol kúıdi oryndaıtyn kúıshiniń tartýymen sáıkestendirilip hattalǵan. Kúıshiler týraly negizgi maǵlumattar men kúılerdiń ańyz áńgimelerden turatyn ǵylymı-tanymdyq túsiniktemeleri de birinshi tomnyń jalǵasy ispettes qazaq, orys, aǵylshyn tilderinde qosa jarııalanypty.

Sondaı-aq tuńǵysh ret qazaqtyń tól murasy usynylǵan basylym zamanaýı formatta elektrondy quraldarǵa kóshirip alyp paıdalanýǵa qolaıly bolatyndaı arnaıy QR kodpen, CD dıskpen birge jaryqqa shyǵyp otyr.

Týyndynyń tusaýkeser rásiminde  kóne saryndardyń bastaý bulaǵy,  janrlyq ereksheligi, tarıhı damý úderisi, olardyń saqtalý men nasıhattalý joldary, ulttyq qundylyqtardyń keleshek urpaqqa tárbıelik máni jaıynda oramdy oılar aıtyldy. Máni erek eńbektiń jaryq kórýine kásibı mamandar, kúı ónerin tarıhı-teorııalyq turǵydan zerttegen kúıtanýshy-ǵalymdar, kóne aspaptardyń saqtalýyna erekshe úles qosyp júrgen belsendiler jumyldyrylyp, dombyra kúıleriniń aımaqtyq dástúrlerin jalǵastyrǵan kúı sheberleriniń tájirıbesi men bilimi ortaǵa salyndy.

Olardyń arasynda – QR UǴA korr.-múshesi, fılologııa ǵylymdarynyń doktory K.I. Matyjanov, ónertaný doktorlary G.N.Omarova, S.Y.О́teǵalıeva, fılologııa ǵylymdarynyń doktory T.A.Qońyratbaı, joba jetekshisi, ónertaný kandıdaty A.J.Qaztýǵanova, óner ordalarynyń rektorlary Arman Júdebaev, Aqan Ábdýáli, dáýlesker kúıshiler Shámil Ábiltaev, Seken Turysbekov, Aıgúl Úlkenbaeva, Abdýlhamıt Raıymbergenov, Nurken Áshirov  qatarly ónersúıer azamattar bar.

Sońǵy jańalyqtar

Elorda «jasyl» aımaqqa ótti

Koronavırýs • Keshe

Uqsas jańalyqtar