Bas qolbasshylar men qolbasshylar mamandyq boıynsha daıarlyqtyń ótý barysyn baıandady. Qurlyq áskerlerinde barlyq baǵyttardaǵy mamandarmen sabaqtar, onyń ishinde desantshy jaýyngerlerdiń parashıýtpen sekirýler ótýde. Taýdaǵy Alpi bólimsheleri áskerı qyzmetshileriniń is júzindegi jıyndary men jattyǵýlary bastaldy.
Áýe qorǵanysy kúshterinde josparly ushý oqý-jattyǵýlary, ushý quramynyń parashıýttik daıarlyǵy jáne ÁShQQ áskerleriniń áskerı qyzmetshilerine tehnıkalardy úıretý júrgiziledi.
Áskerı-teńiz kúshterinde teńizshiler kemeniń materıaldyq bóligin, beriktikke kúres is-sharalaryndaǵy jeke is-qımyl tártibin pysyqtaıdy. Mamandyq boıynsha daıyndyq kezeńi bıyl 2 shildede baqylaý sabaqtarynyń ótýimen aıaqtalady.
Áskerı bilim berý suraqtary qaraldy. Áskerı oqý oryndarynda oqý jyly aıaqtalýda. О́tken aptada Ulttyq qorǵanys ýnıversıtetin 145 magıstrant bitirip, «Jas ulan» respýblıkalyq mektepteriniń 889 túlegine attestattar tabystaldy.
Jýyrda Radıoelektronıka jáne baılanys áskerı-ınjenerlik ınstıtýtynda, Qurlyq áskerleriniń Áskerı ınstıtýtynda ofıserler, Shoqan Ýálıhanov atyndaǵy Qorǵanys mınıstrliginiń áskerı kolledjinde serjanttar oqýyn bitirip, olardy bólý josparlanýda.
Keńes barysynda áskerı oqý oryndary túlekteriniń qyzmet ótkerýine turaqty monıtorıng júrgizý tapsyryldy. Onyń negizinde qajet bolǵan jaǵdaıda kadrlardy neǵurlym tıimdi daıarlaý úshin oqý úrdisine túzetýler engizýdi júktedi.
«Sıfrlyq ofıser» oqý jobasyn iske asyrý týraly jeke baıandaldy. Búgingi tańda ómirdiń barlyq salasy sıfrlandyrylyp jatqanda, armııada ofıserlerdi daıarlaýda, olardyń aqparattandyrýdyń barlyq aspektilerin, avtomattandyrylǵan basqarý jáne jasaqtama júıelerin meńgerýin eskere otyryp júrgizý kerek. Áskerı oqý oryndarynda buǵan qajetti oqý-ádistemelik baza bar. Bul rett, jas ofıserlerdiń alǵan bilimderin is júzindegi qyzmet barysynda keńinen qoldanýyna nusqaý berildi.
О́rt qaýipti maýsymnyń bastalýyna qaraı áskerlerde órtke qarsy qorǵanys sharalaryn kúsheıtý: onyń ishinde obektilerdiń jabdyqtaryn tekserý, tehnıkalyq órt sóndirý quraldary men kommýnıkasııalar jaramdylyǵyn qamtamasyz etý, órtke qarsy shtattyq bólimshelerdi daıyndyqqa keltirý jáne shtattan tys órt sóndirý komandalarynyń quramyn kún saıyn naqtylaý. Oq-dárilerdi, JJM, qarý-jaraq pen áskerı tehnıkany, materıaldyq quraldardy saqtaý nysandaryna jiti nazar aýdarý tapsyryldy.
Semeı, Jańǵyztóbe, О́skemen garnızondaryna jumys saparynyń nátıjesinde mınıstr áskerı qyzmetshiler men olardyń otbasy músheleriniń, ásirese shalǵaı áskerı bólimder men garnızondardaǵylardyń ómir súrýi, turmys jaǵdaılaryn taldaýdy tapsyrdy. О́mir súrýge qolaıly jaǵdaı jasaý úshin demalys oryndaryn, kommýnıkasııa qyzmetterin jáne basqa da tirshilikke qajetti máselelerdi qamtamasyz etýdegi keshendi sharalardy qabyldaýdy júktedi.
Bas áskerı-medısınalyq basqarmasynyń bastyǵy áskerlerdegi epıdemıologııalyq ahýaldy baıandady. Jeke quramǵa ekpe egý bastalýymen jaǵdaı turaqtandy. Koronavırýs ınfeksııasyn juqtyrýdyń ilýde bir baıqalýy elimizdiń túrli aımaqtarynan kelgen sarbazdarmen baılanysty.
Josparǵa sáıkes 15 maýsymnan bastap merzimdi qyzmettegi áskerı qyzmetshilerdi zapasqa shyǵarý bastalady. Dástúr boıynsha, kóktemde sarbazdar sáýir-mamyr aılarynda boryshtaryn óteýden bosatyldy. 2020 jyly pandemııa kezinde áskerge shaqyrýdyń keıinge qaldyrylýyna oraı jaýyngerler zapasqa keshteý shyǵarylýda. Osylaısha, barlyq «merzimdi qyzmettegiler» qoldanystaǵy zańnamada belgilengendeı dál 12 aı qyzmet etedi jáne qyzmet etý merzimi aıaqtalǵannan keıin óz óńirlerine jiberiledi. Áskerı oqytylǵan rezerv retinde olar jergilikti áskerı basqarý organdaryna esepke alynady.
