Kezdesýde Qasym-Jomart Toqaevqa Qazaqstandaǵy qazirgi sanıtarlyq-epıdemıologııalyq ahýal jáne turǵyndarǵa ekpe salý barysy týraly esep berildi.
Mınıstrdiń aıtýynsha, jalpy elimizdegi ahýal turaqty, ótken aılarmen salystyrǵanda indet juqtyrǵandardyń sany eki ese qysqarǵan. Respýblıka boıynsha ólim-jitim kórsetkishi 2 aptanyń ishinde 1,6 ese tómendegen. О́ńirlerdegi epıdemıologııalyq ahýaldyń jaqsarýyna baılanysty aýrýhanalarda em alyp jatqan naýqastardyń sany azaıǵan.
16 maýsymdaǵy jaǵdaı boıynsha Memleket basshysyna usynylǵan málimetterge sáıkes COVID-19 indetine qarsy vaksınanyń birinshi komponenti 2 mıllıon 587 myń adamǵa, ekinshi komponenti 1 mıllıon 480 myń adamǵa salynǵan. Kún saıyn shamamen 80-100 myń adamǵa ekpe egiledi. О́ńirlerde vaksına tapshylyǵy joq. Vaksına kestege sáıkes jetkizilip jatyr.
Qasym-Jomart Toqaev halyqty vaksınalaý máselesine nazar aýdaryp, óńirler boıynsha atalǵan baǵyttaǵy jumystardy kúsheıtýdi tapsyrdy.
Prezıdent ekpe egý koronavırýs indetin eńserýdiń birden-bir joly ekenin eske salyp, halyqty Qazaqstanda qoljetimdi vaksınalardy belsendi túrde salǵyzýǵa shaqyrdy.
Memleket basshysy dárigerlerdi qorǵaý máselesine arnaıy toqtaldy. Onyń pikirinshe, medısına qyzmetkerleriniń quqyqtyq jáne áleýmettik turǵydan qorǵalýy áli de tómen deńgeıde qalyp otyr. Osy oraıda dárigerlerdiń mártebesin aıqyndaýdyń jáne olardy yntalandyrýdyń keshendi júıesin engizý qajet.
Qasym-Jomart Toqaev Alekseı Soıǵa medısına qyzmetkerleriniń mártebesin qoldaý jónindegi zańnamalyq bastamalardy pysyqtaýdy tapsyrdy.
