Forýmnyń pikirtalas alańdarynda ShYU elderinde áıelderdiń quqyqtaryn qorǵaýdyń ınstıtýsıonaldyq tetikterin nyǵaıtý, kemsitýshilikti, onyń ishinde áıelder men qyzdarǵa qatysty zorlyq-zombylyqty joıý máselelerindegi ózara is-qımyl men yntymaqtastyqty jaqsartý, sondaı-aq áıelderdiń kásipkerlik qyzmet salasyndaǵy quqyqtary men múmkindikterin keńeıtý máseleleri talqylandy.
«Pandemııamen baılanysty jahandyq qıyndyqty eńserý úshin barlyq el úshin qazirgi qıyn ýaqytta áıelderdiń kúsh-jigeri erekshe mańyzǵa ıe boldy. Áıelder oń ózgerister men progrestiń, daǵdarys saldaryn eńserýdiń qozǵaýshy kúshi bola alatynyn túsiný mańyzdy», dedi L.Ramazanova.
Ulttyq komıssııa basshysy teńdik qaǵıdattaryn jappaı ilgeriletýge ulttyq ınstıtýttardyń áleýetin jáne áıelderdiń quqyqtaryn qorǵaý tetikterin nyǵaıtý, áıelderdiń sheshimder qabyldaý deńgeıinde demokratııalyq qatysýyn damytý, sondaı-aq barlyq salada áıelderdiń quqyqtary men múmkindikterin keńeıtý yqpal etetinin atap ótti.
Forým alańynda beıbitshilik jáne óńirlik qaýipsizdik máseleleri qozǵaldy. «Qazaqstan ıadrolyq qarýdan óz erkimen bas tartqan beıbitsúıgish memleket retinde óńirlik jáne halyqaralyq deńgeılerde elder arasynda janjaldy jaǵdaılarǵa jol bermeýdi qoldaıdy. Biz áıelder preventıvti dıplomatııanyń aldyńǵy qatarynda bolýǵa, óńirdegi ózara senimdi, tatý kórshilikti, beıbitshilik pen qaýipsizdikti nyǵaıtý boıynsha ortaq kúsh-jigerimizdi jumyldyrýǵa tıispiz», dep atap ótti Qazaqstan Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa tóraıymy.
Qazaqstan Respýblıkasyndaǵy Adam quqyqtary jónindegi ýákil Elvıra Ázimova forýmǵa qatysýshylardy Memleket basshysynyń 2021 jylǵy 9 maýsymda qol qoıǵan «Qazaqstan Respýblıkasynyń adam quqyqtary salasyndaǵy odan ári sharalary týraly» Jarlyǵy jóninde habardar etti. Onda Úkimetke adam quqyqtary salasyndaǵy, onyń ishinde áıelderge qatysty kemsitýshilikti joıýǵa baǵyttalǵan birinshi kezektegi is-sharalar josparyn qabyldaý tapsyrmasy qamtylǵan.
Qazaqstandyq tarap qaralatyn máseleler boıynsha yntymaqtastyqty nyǵaıtýǵa jáne halyqaralyq bastamalardy iske asyrýǵa syndarly úles qosýǵa daıyn ekenin bildirdi. ShYU-ǵa múshe memleketterdiń áıelderdiń saıası kóshbasshylyǵy máseleleri, áıelderdi qoldaý maqsatynda daǵdarysqa qarsy qabyldanǵan sharalar jáne áıelder quqyǵyna qatysty basqa da máseleler boıynsha aqparat jáne ozyq tájirıbe almasýdyń Biryńǵaı bankin qurý usynyldy.
