Bıyl elordada 317 shaqyrym jeli salynady, onyń 170 shaqyrymy birinshi jartyjyldyqta salyndy.
«Taıaý jyldary elorda tolyqtaı gazǵa qosylady. Qalaǵa gaz jelisin júrgizý ekologııany birshama jaqsartýǵa septik etedi, sebebi jeke sektordaǵy turǵyndar úılerin endi kómir jaǵyp jylytpaıtyn bolady, sonymen qatar qaýipsizdik te arttyrylyp, azamattardyń turmys jaǵdaıy jaqsarady.
Búgin qaladaǵy gaz júrgizý jumystarynyń barysymen tanystym. Kóktal-1 eldi mekeni tolyǵymen gazǵa qosyldy. Ol úshin shaǵyn aýdanda 70 km gaz taratý jelileri salyndy. Tek osy eldi mekenniń ózinde ǵana 2600 úı gazǵa qosylý múmkindigine ıe boldy. Gazdy úıiniń ishine deıin tartyp alǵan Kóktal-1 eldi mekeni turǵyndary gaz qostyrý úshin «QazTransGaz» AQ-ǵa habarlasýy kerek», dep jazdy elorda ákimi.
Odan bólek, Ońtústik-Shyǵys, Agrogorodok (jarty bóligi 2020 jyly qosylmaı qalǵan edi), О́ndiris eldi mekenderinde gaz taratý jelilerin salý jumystary jalǵasýda. Sonymen qatar «QazTransGaz Aımaq» AQ Kúıgenjar, Mıchýrıno, Internasıonalnyı eldi mekenderinde gazben jabdyqtaý jelilerin salýda.
Osylaısha atalǵan eldi meken turǵyndary jańa jylytý maýsymynda úılerin gazben jylytý múmkindigine qol jetkizedi.
Qala ákiminiń aıtýynsha, gazdandyrý úderisi kestege saı júrgizilýde. Mysaly, ótken jylytý maýsymynda Jeleznodorojnyı, Kóktal-2 eldi mekenderi men Agrogorodok eldi mekeniniń bir bóligi gazǵa qosylý múmkindigine ıe boldy. Ol kezde 345 km ishki kvartal jelileri salynǵan. Al bıyl taǵy 317 km, sonyń ishinde 170 km jeli alǵashqy jartyjyldyqta salyndy.
«Gazdandyrý bastalǵaly beri úıdi gazben jylytýǵa kóshirý boıynsha az qamtylǵan otbasylarǵa áleýmettik kómek berý mehanızmderi engizildi. Áleýmettik kómektiń osy túrin alýǵa ótinimdi egov.kz elektrondy úkimet portaly arqyly berýge bolady («Elektrondyq ótinishter» - «qyzmetke onlaın tapsyrys berý». Mazmun jazylatyn baǵanda «Turǵyn úıdi gazdandyrýǵa áleýmettik kómek» degendi, alýshy degen baǵanda «Jumyspen qamtý jáne áleýmettik qorǵaý» degendi basý kerek).
Sonymen qatar byltyr gazǵa tarıf baǵasy tómendetildi: bir tekshe metr gaz baǵasy 45 teńgeden 34,6 teńgege deıin arzandady(buryn bir tekshe metr úshin 60 teńge belgileý týraly aıtylǵan). Jeke sektor turǵyndary úshin biz eseptegish quraldardy tegin berýdi qarastyrdyq.
«Halyk bank» AQ jáne «ECOLER» qaýymdastyǵymen birge úılerdi gazǵa kóshirý boıynsha azamattarǵa paıyzsyz nesıe berý isin uıymdastyrdyq.
Sondaı-aq jylý elektrlik ortalyqtaryn jańǵyrtýdy jalǵastyryp jatyrmyz. 1-JEO jáne 2-JEO boıynsha tórt sý jylytý qazandyǵy gazǵa kóshirildi, osy jyldyń sońyna deıin basqa da qazandyqtardy gazben jylytýǵa kóshiremiz.
Gazdandyrý - Elbasynyń strategııalyq jobasy. «Saryarqa» magıstraldyq gaz qubyry Ortalyq Qazaqstan men elordany eldiń biryńǵaı gaz kólik jelisimen qosady.
Bul úderis Memleket basshysynyń tikeleı baqylaýyna alynǵan», dep jazdy elorda ákimi.
