Ári birinshi kezdesýde Danııa quramasynyń kóshbasshysy Krıstıan Erıksen esinen tanyp qulap, búkil álem halqyn alańdatyp qoıǵan edi. Sol bir aýyr sát oıynshylarǵa da áserin tıgizip, týrnır aýtsaıderiniń biri sanalǵan Fınlıandııaǵa ese jiberip alǵan. Sodan bolar búgingi matchty Kasper Hıýlmand shákirtteri asa belsendi bastady. Birinshi mınýttan bastap Kýrtýa qaqpasyna tynyshtyq bergen joq. Taıly-tuıaǵy qalmaı shabýyldady. Quddy bir oıynnyń sońǵy mınýttarynda jantalasyp jatqandaı jan alyp, jan berip oınady. Nátıjesi de kóp kúttirgen joq. Aıyp alańyndaǵy qarbalas sátte Iýssýf Poýlsen tepken dopqa Tıbo Kýrtýa jete alǵan joq. Danııa budan keıin de qorǵanysqa qaraılaı qoımady. Shabýyldaýdy odan ári jalǵastyrdy. Jalpy, birinshi taımdy Danııanyń taımy desek te bolǵandaı.
Sondaı-aq qos qurama oıynnyń 10 mınýtynda matchty bir sátke toqtatyp, qazir aýrýhanada jatqan Krıstıan Erıksenge qurmet kórsetti.
Oıynnyń ekinshi jartysynda Belgııa quramasynyń kózirleri Kevın De Brıýıne men Eden Azardyń alańǵa kirýi oıyn kartınasyn ózgertti. Kezekti shabýyldardyń birinde Lýkaký Kevın De Brıýınege, «Manchester Sıtı» lıderi Torgan Azarǵa ádemi pas asyryp, Azar dat qaqpashysy Shmeıhel tosqaýyl bola almastaı soqqy jasap, gol soǵyp ketti. Osydan keıin aq Belgııa qorǵanýshy pozısııadan shabýyldaýshy pozısııaǵa anyq oıysty. 70 mınýtta Kevın De Brıýıneniń ózi alystan soqqy baǵyttap, esepti eseledi. Oıyn sońyna qaraı Danııanyń bastapqy qarqyny da báseńdeı berdi. Kasper Hıýlmand oıyn bitýge 20 mınýt qalǵan sátten bastap birneshe tyń oıynshyny alańǵa shyǵardy. Alaıda bul rokırovkalar esh nátıje bergen joq.
Osylaısha V tobynda Belgııa 6 upaımen senimdi túrde kósh bastady. Odan keıin enshisinde 3 upaıdan bar Reseı men Fınlıandııa tur. Danııa quramasynyń qorjyny bos. Kelesi týrda Belgııa Fınlıandııamen aladop alamanyn jasasa, Danııa Reseı quramasynan 3 upaı alýǵa tyrysady.
