QS WUR (Quacquarelli Symonds World University Rankings) halyqaralyq akademııalyq reıtıngi – álemdegi eń bedeldi reıtıngterdiń biri. Dúnıe júzindegi ýnıversıtetterge jyl saıyn baǵa berip, túrli sanattar boıynsha kórsetkish nátıjelerin jarııalap otyrady. Sol QS WUR reıtıngtiń bıylǵy tizimine 14 qazaqstandyq JOO endi. Onyń keıbiri burynǵy ornyn saqtap qalsa, endi biri joǵarylaǵan. Aıtalyq Ál-Farabı atyndaǵy Qazaq ulttyq ýnıversıteti kezekti ret 175-orynǵa turaqtap, álemdegi 200 úzdik ýnıversıtettiń qatarynan kórindi. Al L.N.Gýmılev atyndaǵy Eýrazııa ulttyq ýnıversıteti 90 pozısııaǵa kóterilip 328-oryndy, Muhtar Áýezov atyndaǵy Ońtústik Qazaqstan ýnıversıteti 482-oryndy ıelenip, úzdik 500 oqý ornynyń tizimine endi. Sonymen qatar reıtıngke Satbayev University, Qazaq ulttyq agrarlyq zertteý ýnıversıteti, Abaı atyndaǵy Qazaq ulttyq pedagogıkalyq ýnıversıteti, S.J.Asfendııarov atyndaǵy Qazaq ulttyq medısına ýnıversıteti kirdi.
– Reıtıng tarıhyna kóz júgirtsek, bıyl onyń quramyna qazaqstandyq joǵary oqý oryndarynyń rekordtyq sany kirdi. Reıtıngke engizilgen 14 joǵary oqý ornynyń jeteýi sońǵy jyly óz pozısııalaryn jaqsarta tústi. Bul qazaqstandyq joǵary bilimniń halyqaralyq deńgeıdegi tanymaldylyǵynyń arta túskenin kórsetedi, – dedi Joǵary jáne joǵary oqý ornynan keıingi bilim departamentiniń dırektory Ádilet Toıbaev.
Mınıstrlik ókiliniń málimdeýinshe, joǵary oqý oryndarynyń pozısııalaryn esepteý kezinde reıtıngte akademııalyq toptar men jumys berýshi uıym ókilderinen jınalǵan saýaldamalardyń nátıjeleri, sondaı-aq 2015 jyldan bastap 2019 jylǵa deıingi kezeńdegi 14,7 mln jarııalanym eskerilgen. Álemdik reıtıngterde ilgerileý – qazaqstandyq bilim berý sapasynyń odan ári jaqsara túsýiniń jáne ýnıversıtetterdiń joǵary mártebesiniń dáleli.
Byltyr 601-650 orynda bolǵan Abaı atyndaǵy Qazaq ulttyq pedagogıkalyq ýnıversıteti bıyl 50 orynǵa kóterilip, 551-560 qatarǵa turaqtady. Atalǵan oqý ornynyń jaqynda taǵaıyndalǵan rektory Darhan Bilálov jumyspen qamtylǵan túlekterdiń úlesi joǵary nátıje kórsetýge septigin tıgizgenin aıtty.
– Mundaı joǵary reıtıngke bizdiń ýnıversıtettiń akademııalyq ortadaǵy bedeli, sondaı-aq tabysty jumyspen (95%) qamtylǵan túlekterimizdiń ult tárbıesi men bilimine úles qosýy áser etti. Biz negizgi jumys berýshilerimizben belsendi qarym-qatynas ornatyp otyrmyz. Ýnıversıtettiń halyqaralyq deńgeıge kóterilýi Abaı atyndaǵy QazUPÝ-dyń burynǵy basshysy Takır Balyqbaevtyń bastamalary men qoldaýynyń nátıjesi ekenin atap ótken jón. Abaı ýnıversıtetiniń otandyq jáne álemdik deńgeıde damýyna oqytýshylar men ǵalym-zertteýshilerdiń qosqan úlesi de erekshe. Buǵan bilim berý salasyndaǵy ulttyq jáne halyqaralyq reıtıngterdegi kórsetkishterdiń turaqty ósýi dálel bola alady. Túptep kelgende, bul – ujym júrgizip otyrǵan jemisti jumystyń senimdi kórsetkishi, – deıdi rektor.
Qosa keteıik, reıtıngti shyǵarýda QS sarapshylary álemniń 93 elinen 1 673-ten asa ýnıversıtettiń derekterin taldady. Reıtıngke 1 300 joǵary oqý orny kirdi. Bul reıtıng 14,7 mln-nan asatyn ǵylymı jarııalanymǵa taldaý jasaý, 96 mln-nan kóp dáıeksózdi eskerý, 450 myńnan asa jumys berýshi men akademııalyq qoǵamdastyqtyń 2 mln ókilinen saýaldama alý arqyly jasaldy.
