Aımaq basshysy kúrdeli kezeńde úlken jaýapkershilik tanytyp, shynaıy janashyrlyqpen kúndiz-túni eńbek etken árbir aq halatty abzal jandardyń eńbegin erekshe atap ótip, kásibı mamandarǵa ıgi tilegin arnady.
«Aýyrǵan jandy emdeý, onyń ómirin saqtaý sizderdiń Otan, adamzat aldyndaǵy qasıetti boryshtaryńyz. Sońǵy jyldary álemdik indet bizge medısına mamandarynyń qajettiligin burynǵydan da artyq sezindirip, mártebesin bıiktete tústi.
Sizderdiń bul eńbekterińiz shyn máninde barlyq qurmetke laıyq! Bul oraıda, álemdegi eń izgi, eń qasterli mamandyq ıeleriniń qyzmeti memleket tarapynan joǵary baǵalanyp keledi. Árıne, eń úlken baǵa – halyqtyń shynaıy kóńili ekeni sózsiz. Syndarly kezeńde dertine shıpa izdegen árbir jerlesimiz bul rette sizderge dán rıza dep bilemin», dedi Gúlshara Ábdiqalyqova.
Indetti aýyzdyqtaýda aldyńǵy shepte júrgen medısına mamandaryna memleket tarapanynan qoldaý joǵary deńgeıde júrýde. О́tken jyly oblys boıynsha vırýspen kúresken 3 myńǵa jýyq medısına qyzmetkerine 3 mlrd teńge kóleminde ústemaqy tólendi. Al, jıyrmadan astam medısına qyzmetkeri joǵary memlekettik nagradamen, 107 qoǵam belsendisi «Halyq alǵysy» medalimen marapattaldy.
Kásibı merekede oblys ákimi qajyrly eńbek etken, qysyltaıań shaqta kásibıliktiń joǵary úlgisin kórsetken birqatar medısına mamandaryn marapattady. QR Densaýlyq saqtaý mınıstrliginiń «Eńbek ardageri» medalimen oblystyq ftızıopýlmonologııa ortalyǵynyń ftızıatr dárigeri Tórehan Bektegen, kópbeıindi oblystyq aýrýhananyń hırýrg dárigeri Mamytbek Káribaev, oblystyq keńes berý dıagnostıkalyq ortalyǵynyń nefrolog dárigeri Patmash Qurmanaeva, «Senim» emhanasynyń akýsher-gınekolog dárigeri Zoıa Daırova, «Aral» dárigerlik emhanasynyń meıirgeri Ibagúl Balshymbaeva laıyq dep tanyldy. Al, «Respýblıkalyq elektrondy densaýlyq ortalyǵy» Qyzylorda oblysy boıynsha fılıal dırektory Sáýle Nálibaeva Ulttyq medısınalyq Assosıasııasynyń «Altyn dáriger» tósbelgisiniń ıegeri atandy. Sonymen birge 7 azamat oblys ákiminiń Alǵys hatymen, 13 maman «Densaýlyq saqtaý isiniń úzdigi» tósbelgisimen, 11 dáriger «Densaýlyq saqtaý isine qosqan úlesi úshin» tósbelgisimen marapattalady.
Saltanatty jıynda «Bizdiń súıikti dáriger - 2021» konkýrsynyń jeńimpazdary da qurmet tórinen kórindi. «Úzdik densaýlyq menedjeri» nomınasııasymen oblystyq psıhıkalyq densaýlyq ortalyǵynyń bas dárigeri Ádilbaı Medetbaev marapattalsa, «Úzdik aýrýhana dárigeri» nomınasııasyn Aral aýdanaralyq aýrýhanasnyń dárigeri Gúljanat Tólepova jeńip aldy. Qos marapat ıesine 1 mıllıon teńgeniń aqshalaı sertıfıkaty tabystaldy. Al, kópbeıindi qalalyq aýrýhanasynyń meıirbıkesi Raýshan Tomanova «Úzdik aýrýhana meıirgeri» nomınasııasyna laıyq dep tanylyp, 700 myń teńge qarjylaı syıaqyny ıelendi.
Eńbegi elengen medısına mamandaryna shynaıy alǵysyn jetkizgen oblys ákimi Gúlshara Ábdiqalyqova indettiń beti áli tolyq qaıtpaǵanyn qaperge salyp, qalypty tirshilikke oralý úshin ekpe egýdiń mańyzdy ekenin aıtyp, dárigerlerge senim bildirdi.
