Vengrııa – Fransııa
Kezekti oıyn kúniniń alǵashqy matchy Vengrııada ótedi. Mbappe bastaǵan jigitter áıgili Pýshkashtyń otandastarynan emtıhan qabyldamaq. Bulaı deýimiz beker emes. Fransııa dál qazirgi álem chempıondary. Onyń ústine, komandadaǵy búkil fýtbolshy «sen tur, men ataıyn» dep turǵan juldyzdar. Sondyqtan matchtaǵy basty favorıtter de fransýzdar.
Statıstıkaǵa kóz júgirtsek, tarazy basy Vengrııa jaqta ekenin ańǵaramyz. Búginge deıin eki komanda 25 ret kezdesse, Majarstan 14 márte jeńiske jetken. Úsh oıyn teń aıaqtalsa, 8 oıynda fransýzdardyń mereıi ústem bolǵan.
Áıtse de, majarlar jeńisteriniń bári ótken ǵasyrǵa tıesili. Sońǵy ret quramalar 2005 jyly kezdesipti. Atalǵan oıynda Zıdan bastaǵan jigitter Vengrııany 2:1 esebimen utty.
Árıne, vengrler de qarap qalmasy anyq. Oıyn óz elinde ótetindikten, majarlar baryn salady. Onyń ústine, ótken týrda olar utylyp qaldy. Sondyqtan abyroıdy saqtap qalý úshin eń bolmasa teń túsý qajet.
Portýgalııa – Germanııa
F tobyndaǵy ekinshi oıyn Portýgalııa – Germanııa arasynda ótedi. Bul match ásirese nemister úshin mańyzdy. Birinshi týrda býntestım Fransııadan 0:1 esebimen utylyp qaldy. Alda-jalda bul oıynda jeńilip qalsa, dúbirli dodamen qoshtasýy ábden múmkin. Sondyqtan Ioahım Levtiń komandasy baryn salady.
Portýgalııa da úsh upaı artyq etpeıdi. Eýropa chempıondary bıyl óz ataqtaryn qorǵap qalýdy kózdeıtini anyq. Onyń ústine, komanda da 4 jyl burynǵyǵa qaraǵanda áldeqaıda ósken. Iаǵnı, dál qazir Portýgalııanyń naǵyz juldyzdy shaǵy.
Búginge deıin eki komanda ózara 10 oıyn ótkizdi. Nemister 6 márte jeńiske jetse, 3 oıyn teń aıaqtaldy. Bir ǵana matchta Portýgalııa aılasyn asyrdy. Onyń ózi sonaý 2000 jylǵy Eýro dodada bolǵan edi.
Búgingi matchqa býndestım sapynan Lýkas Klostermann, Mattıas Gınter, Ionas Hofmann jaraqatyna baılanysty qatyspaıdy.
Aıtpaqshy, taıaýda Portýgalııanyń juldyzy Krıshtıaný Ronaldýdyń ınstagramdaǵy folloýerleriniń sany 300 mıllıonnan asty. Buǵan deıin eshkim mundaı deńgeıge kóterilmegen edi. Munyń ózi KrıRo-nyń tanymaldyǵyn kórsetse kerek.
Ispanııa – Polsha
Týrdy Ispanııa men Polsha qorytyndylaıdy. Qaı-qaısyna da upaı aýadaı qajet. Birinshi týrda Lýıs Enrıke shákirtteri Shvesııamen teń túsken. Keshe skandınavtar Slovakııany jeńip, birinshi orynǵa shyǵyp ketti.
Al Polsha birinshi týrda Slovakııaǵa ese jiberdi. Alda-jalda Ispanııadan utylyp qalsa, kelesi týrǵa shyǵýy ekitalaı. Sondyqtan aldaǵy match ne bel, ne belbeý ketetin oıyn bolmaq.
Búgingi deıin komandalar 12 márte kúsh synasty. 8 oıynda Ispanııa fýtbolshylarynyń mereıi ústem boldy. 3 márte Polsha jeńis toıyn toılasa, bir ǵana match teń aıaqtaldy. Sońǵy ret komandalar 2010 jyly kezdesip, pıreneılikter 6:0 esebimen tas-talqan etken-di. Sol kezde alańǵa shyqqan fýtbolshylardan Robert Levandovskıı men Kamıl Glık qana qaldy. Atalǵan matchqa qatysqan Serhıo Býskets koronavırýspen aýyrǵanyna baılanysty oıynǵa qatyspaıdy.
