Fýtboldan Eýropa chempıonatynyń toptyq kezeńi qyzyp keledi. Shırek fınal jaqyndaǵan saıyn júırikter shıryǵa túsken. Ázirge el kútpegen anaý aıtarlyq sensasııa bola qoıǵan joq.
20 maýsym kúni toptyq kezeńniń úshinshi týry bastaldy. A tobynyń komandalary Rım men Bakýde toqaılasty. Osy toptyń ǵana emes, týrnırdiń anyq favorıtine aınalǵan Italııa asa tartysty ótken kezdesýde Ýelsten basym túsip, tolyq 9 upaı jıdy. Tóreshi ysqyra salysymen Ýels qaqpasyn torýyldaýmen bolǵan Manchını shákirtteri aqyry 39 mınýtta qaqpa kiltin tapty. Matteo Pessına esep ashyp, komandasyn alǵa shyǵardy. 2-shi taımda da ıtalııalyqtar qarqyndy oıyn órnegin kórsetti. 55 mınýta Itan Ampadý dóreki oıyny úshin qyzyl qaǵaz alyp, alańnan ketti. On oıynshymen oınaý Ýelske tipti qıynǵa soqty. Soǵan qaramastan kezdesý sońyna deıin esep ózgerissiz kúıinde qaldy.
Al Baký stadıonynda mańyzdy joldamaǵa talasqan Shveısarııa men Túrkııa matchy aldyńǵy quramanyń jeńisimen aıaqtaldy. Esep – 3:1. Altynshy mınýtta Harıs Seferovıch gol soǵyp, komandasyna basymdyq syılaǵan. 1:0 esebiniń qashanda sýsymaly nátıje ekeni belgili. Osyny eskergen shveısarııalyqtar belsendi shabýyldaryn ári qaraı jalǵastyra tústi. Onyń nátıjesi de kóp kúttirgen joq. Djerdan Shakırı 26 mınýtta esepti eselep ketti. Komandalar osy eseppen úziliske shyqqan. Al 62 mınýtta Irfan Kahfedjı bul oıyndaǵy ǵana emes, túrikterdiń osy týrnırdegi jalǵyz golyn soqty. Sóıtip, esep aıyrmasyn qysqartty. Alaıda Kahvedjı goly Túrkııa quramasyna serpilis syılaı almady. 68 mınýtta Shakırı týrnırdegi ekinshi golyn soǵyp, bul kezdesýdegi dýbl avtory atandy.
Al toptaǵy ekinshi orynǵa Ýels quramasy ıe boldy. Negizi Shveısarııa ekeýiniń upaıy teń. Biraq dop aıyrmashylyǵy Rob Peıdj komandasynyń paıdasyna jumys istedi. Al Italııanyń ekinshi týrda-aq pleı-off kezeńine shyǵyp qoıǵanyn bilemiz.
Shenol Gıýnesh jattyqtyratyn Túrkııa quramasy Eýropa chempıonatynda bir ǵana gol soǵyp, eshqandaı upaı jınaı almaı eline qaıtatyn boldy. Shveısarııa quramasynyń 1/8 fınaldan áli de bolsa úmiti bar. О́ıtkeni úshinshi oryn alǵan 8 ujym jıǵan upaı men qosymsha kórsetkishterine baılanysty pleı-off kezeńine shyǵa alady.
