Sýret: pavlodarnews.kz
Jıyndy ashqan partııa tóraǵasy, Konstıtýsııalyq reforma jónindegi komıssııanyń múshesi Serik Egizbaev Ata zań jobasyn el damýynyń jańa fılosofııasy ári «Ádiletti Qazaqstan» ıdeıasynyń quqyqtyq irgetasy dep atady. «Bul qujat – Memleket basshysy Qasym-Jomart Toqaev usynǵan saıası reformalardyń zańdy jalǵasy. Jańa bir palataly Parlament – Quryltaıdyń qurylýy partııalyq júıeni jandandyryp, aýyl eńbekkerleriniń múddesin jańa deńgeıde qorǵaýǵa jol ashady. Biz úshin basty baılyq – tabıǵı resýrs emes, bilimdi, adal ári básekege qabiletti azamat», dep atap ótti S.Egizbaev.
Otyrys barysynda saıası reformanyń negizgi baǵyttary boıynsha jaryssózder júrgizilip, spıkerler óz tujyrymdaryn ortaǵa saldy. Májilis depýtaty Jıgýlı Daırabaev 145 depýtattan turatyn Quryltaıdyń tarıhı mańyzyna toqtaldy. Onyń aıtýynsha, bir palataly model bıýrokratııalyq kedergilerdi joıyp, bılik tetikteriniń ashyqtyǵy men tıimdiligin arttyrady.
Partııa ardageri Mynaýtaýbıik Ánesov Ata zańda tarıhı-mádenı murany saqtaý men «Din memleketten bólek» qaǵıdatynyń naqtylanýyn joǵary baǵalady. «Bul normalar ulttyq qundylyqtardy qorǵaýdyń quqyqtyq kepili bolmaq», dedi ol óz sózinde.
Sonymen birge jıynda Túrkistan oblystyq fılıalynyń ókili, oblystyq máslıhat depýtaty Nurjan Ájimetov, Soltústik Qazaqstan oblystyq máslıhat depýtaty Olga Klıshına, Qyzylorda oblystyq máslıhat depýtaty Sadyq Mustafa, Qostanaı oblystyq máslıhat depýtaty Dınara Ahmetova sóz alyp, jobaǵa qatysty oılaryn ortaǵa saldy.
Jıyn sońynda «Aýyl» partııasy Saıası keńesiniń músheleri Konstıtýsııa jobasyn muqııat zerdeleýge, ony jan-jaqty túsindirý jumystaryn jandandyrýǵa ári shyndyqqa janaspaıtyn arandatýshylyq jarııalanymdardyń jeteginde ketpeýge shaqyratyn Úndeý qabyldady.
