Mýtasııanyń jańa túri eń juqpaly jáne tez taralady. Elordada qala turǵyndarynyń qaýipsizdigin qamtamasyz etý maqsatynda qosymsha karantındik shekteýler engiziledi. Koronavırýstyń taralýyna jol bermeý sharalary elorda ákimi Altaı Kólginovtiń basshylyǵymen ótken qalalyq shtab otyrysynda qaraldy.
«Qalada aýrýdyń kúrt ósýin tirkeımiz. 54 naýqastan alynǵan synamanyń aldyn-ala taldaýy olardyń 56%-ynda úndi shtammynyń yqtımaldyǵy bar ekenin kórsetedi. Mýtasııanyń jańa túri eń qaýipti, óıtkeni ólim qaýpi joǵary, adamnyń ımmýnıtetine qatty áser etedi. Al 39%-y brıtandyq shtammǵa ıe. Pasıentterdiń 80%-dan astamynda (úndi, brıtandyq shtammdar) klınıkalyq kórinister bar, onyń ishinde 20 naýqas aýrýhanaǵa jatqyzyldy, 20%-ynda sımptomdar joq, onyń ishinde 1 naýqas aýrýhanaǵa jatqyzyldy.
Kópshiligi – dárigerge kóringen. Syrttan kelgen alty naýqas bar: Reseı, Aýǵanstan, Túrkistan, Aqmola oblysy – 2, ShQO», dedi elordanyń bas memlekettik sanıtarlyq dárigeri Sarhat Beısenova.
Elorda ákimi Altaı Kólginov kommýnaldyq qyzmetterdiń, qurylys kompanııalarynyń basshylarymen, mektep/balabaqsha, kolledj, SOO/SÚ/bazar dırektorlarymen, ÚEU jáne basqa da iri kásiporyndardyń ókilderimen kezdesti. Jurttyń qaýipsizdigin qamtamasyz etý jáne koronavırýstyń taralýyna jol bermeý maqsatynda eńbek ujymdaryn vaksınasııalaý qajettiligi aıtyldy. Ujymdyq ımmýnıtetti qalyptastyrý kezinde ǵana olardyń qyzmeti toqtatylmaıdy. Egilgenderdiń sany az bolǵan jaǵdaıda, osy nysandaǵy jumystar toqtatylady.
Úndi shtammynyń juqpaly jáne tez taralatynyn eskere otyryp, qalada qosymsha shekteýler engiziledi.
