SQO Polısııa departamenti baspasóz qyzmetiniń málimetinshe, 86 otandyq avtokólik oblystyq bıýdjet esebinen lızıngilik qarjylandyrý aıasynda satyp alynǵan. Barlyq kólikter ýchaskelik polısııa ınspektorlarynyń jumysyna arnalǵan. Satyp alynǵan kólikterdiń basym bóligi aýyldarǵa jiberiledi. Eldi mekenderde bir ýchaskelik polısııa ınspektory birneshe aýylǵa qyzmet kórsetedi. Ákimshilik ýchaske 100 shaqyrymǵa deıin sozylýy múmkin.
«Qoǵamdyq qaýipsizdikti qamtamasyz etý – basymdyqty mindet. Materıaldyq-tehnıkalyq bazany jaqsartý jáne zamanaýı tehnıkalarmen jabdyqtaý oń nátıjelerin berip jatyr. Sońǵy 5 jylda qylmys sanynyń azaıǵanyn baıqaımyz», dedi oblys ákimi Qumar Aqsaqalov.
Qazaqstan polısııasy kúni qarsańynda óńir basshysy jumysta joǵary kórsetkishtermen erekshelengen qyzmetkerlerge gramotalar men alǵys hattar tabystady.
«Prezıdent óz Joldaýynda jumystyń servıstik modeline kóshý aıasynda «jurtqa jaqyn polısııa» qaǵıdatyn júzege asyrý mindetin qoıdy. Iаǵnı ýchaskelik polısııa ınspektorynyń jaýapkershiligi artady, alaıda onyń nátıjeli jumysy úshin barlyq múmkindikter jasalýy kerek. Osy tapsyrmany oryndaý úshin óńirde qyzmettiń bul túrin materıaldyq-tehnıkalyq jaǵynan nyǵaıtý jumystary júrgizilip jatyr, bul óz kezeginde polıseılerdiń mobıldi bolýyna yqpal etedi», dedi SQO PD bastyǵy Marat Tólebaev.
SQO-da 289 ýchaskelik polısııa ınspektory jumys isteıdi, onyń 88-i oblys ortalyǵynda. Jyl basynan olar 800-den astam qylmystyń betin ashyp, 30 myńǵa jýyq quqyq buzýshylyqty anyqtady. Turǵylyqty jeri boıynsha únemi tekserilip otyratyn shartty túrde merziminen buryn bosatylǵandar, buryn sottalǵandar erekshe baqylaýǵa alynǵan.
Sondaı-aq maskúnemder, nashaqorlar da nazarǵa alynǵan. Jyl basynan 113 soltústikqazaqstandyq maskúnemdikten májbúrlep emdelýge jiberildi. 6220 adam ýchaskelik polısııa ınspektorlarynyń profılaktıkalyq esebinde tur.
Ýchaskelik polıseılerdiń basym bóligi vıdeojetondarmen jáne planshettermen jabdyqtalǵan. Bul, jumysty barynsha tıimdi, jedel jáne ashyq etedi.
