«Qazaq tilin úırenýge kúnine 1,5 saǵat ýaqyt jumsaımyn. Jaqyn arada taza qazaqsha sóıleýge ýáde beremin. Ulttyq ekonomıka mınıstrliginde maǵan qazaq tilin úıretetin qyzmetker bar», dedi eń jas mınıstr.
Eske sala keteıik, 18 qańtarda Memleket basshysynyń jarlyǵymen Ulttyq ekonomıka mınıstri bolyp Áset Erǵalıev taǵaıyndaldy. Áset Erǵalıev - Úkimet músheleriniń arasyndaǵy eń jasy. Ol 34 jasynda mınıstr boldy.
3 aqpanda vedomstvo basshysy retinde Májilis otyrysyna alǵash ret qatysqan Ulttyq ekonomıka mınıstri Áset Erǵalıev qazaqsha suraqqa oryssha jaýap bergeni úshin depýtattan sóz estidi.
«Siz búgin alǵash ret Májiliske kelip tursyz. Biraq qazaqsha qoıylǵan suraqtardyń barlyǵyna esh ruqsat suramastan orys tilinde jaýap berýge kóshtińiz. 18 mıllıon adamnyń ishinen mınıstr bolýǵa jaraǵan ekensiz, jasyńyz da táýelsizdikpen shamalas. Biraq óz ana tilińizde jaýap bermegenińiz uıat dep sanaımyn. Sondyqtan kelesi otyrysta qazaq tilinde, ana tilinde qoıylǵan suraqqa sol tilde jaýap berińiz», dep eskertý jasady Berik Dúısenbınov.
