Atyraýda polıseıler 23 maýsym kúni alaıaqtyq nıetpen turǵyndardyń senimderine kirip, olardyń jeke bank kartochkalarynan aqsha jymqyrǵan belgisiz adamdardy anyqtady. Bir kún ishinde bundaı oqıǵanyń úsh deregi tirkelgen.
Mysaly, belgisiz bireý 37 jastaǵy qala turǵynyna qurylys quraldaryn ákelip beremin dep abonenttik nómirine Kaspi Gold kartochkasy arqyly 805 myń teńge aýdartyp, qaıtarmaı qoıǵan. Jábirlenýshi polıseılerge dereý shaǵymdanyp, nátıjesinde alaıaq anyqtalyp, ustaldy. Tekserý barysynda kúdikti 37 jastaǵy áıel bolyp shyqty. Oǵan qatysty QR QK-niń 190-baby 1-bóligimen sotqa deıingi tergep-tekserý amaldary júrgizilýde.
Taǵy bir jáıt qala turǵyny 45 jastaǵy áıeldiń basynan ótken. Belgisiz bireý áıelge garaj qaqpasyn qondyryp beremin dep abonenttik nómirine 105 myń teńge aqshasyn aýdartyp, qaıtarmaǵan. Azamatsha óziniń aldanyp qalǵanyn túsinip, polısııaǵa aryzdanǵan. Kúdikti birden anyqtalyp, ustaldy. 26 jastaǵy qala turǵynyna qatysty QR QK-niń 190-baby 3-bóligimen sotqa deıingi tergep-tekserý amaldary júrip jatyr.
Osyǵan uqsas oqıǵa Qulsary qalasynda tirkeldi. 49 jastaǵy áıel óziniń balalaryn jumysqa ornalastyramyn dep aldanyp qalǵan. 45 jastaǵy er adam onyń 400 myń teńge aqshasyn aýdartyp, qaıtarmaǵan. Qazirgi ýaqytta kúdiktige qatysty QR QK-niń 190-baby 3-bóligimen sotqa deıingi tergep-tekserý júrgizilýde.
Qazirgi ýaqytta azamattardan ınternet-alaıaqtyqqa baılanysty shaǵym-aryzdarynyń kóbeıip ketýi qylmystyń bul túriniń qatty beleń alyp bara jatqandyǵyn ańǵartady. Máselen, ótken jyly oblys aýmaǵynda ınternet-alaıaqtyq boıynsha bes aı ishinde 300-ge jýyq fakti tirkelse, bıyl jyl basynan 400-ten astam fakti tirkelgen.
