Men de ózimniń jap-jas kezimnen jýrnalıstik mamandyqty tańdaǵanyma, ómirimniń uzaq jyldaryn osy salaǵa arnaǵanyma esh ýaqytta ókinbeımin. Qoǵam qaıratkeri, jazýshy retinde qalyptasýyma, rýhanı ósýime osy salanyń shapaǵaty tıdi. Qazaq baspasóziniń qara narlary, kók bórileri Sherhan Murtaza, Sapar Baıjanov syndy aǵalarmen birge qyzmet atqaryp, mektebinen óttim, olardyń maǵan úlken senim, jaýapkershilik artyp, árdaıym qoldap otyrǵandary arqasynda osy salada biraz bıikterge kóterildim. Sheraǵań «Lenınshil jas» gazetiniń redaktory bolǵan kezderde ol kisiniń orynbasary boldym. Sapekeń «Sosıalıstik Qazaqstan» gazetin basqaryp turǵanda redaksııa alqasynyń múshesi jáne ádebıet pen óner bóliminiń meńgerýshisi mindetterin atqardym. Osy gazettegi óner adamdary týraly jarııalanǵan ocherkterime Qazaqstan Jýrnalıster Odaǵynyń birinshi syılyǵy berildi. Odan keıingi jyldarda respýblıkalyq «Jalyn» baspasyn, «Qazaqkitap» kitap saýdasy basqarmasyn, memleketaralyq «Zaman-Qazaqstan» gazetin, qos palataly Parlament Senatynyń Parlament aktilerin aýdarý, redaksııalaý jáne basyp shyǵarý bólimin basqaryp, jasym kelgen soń zeınetke shyqtym.
Búgingi tańda «Egemen Qazaqstan» gazeti bastaǵan respýblıkamyzdyń kóptegen gazetteri men jýrnaldary elimizdiń ıgiligi úshin qajymaı-talmaı, qajyrlylyqpen eńbek etip keledi. Men jýrnalıstıka salasyndaǵy inilerim men qaryndastarymnyń, qazirgi jastarymyzdyń jazǵan ekonomıkalyq, áleýmettik, rýhanı mańyzdy máselelerdi kótergen tushymdy maqalalaryn oqyǵan saıyn qýanamyn. Olarǵa ishteı keleshekte de shyǵarmashylyq tabystar tilep otyramyn. Búgingi tańda ınternet jelisinde jumys isteıtin jýrnalısterdiń jańa býyny ósip-jetilip, kóbeıip keledi. Aqparattyń taralýy burynǵydan áldeqaıda jyldamdaı tústi. Munyń bári – jaqsylyq, zamanymyzdyń jańa lebi dep bilemin.
Osydan az ǵana ýaqyt buryn belgili jýrnalıst, aqyn, jazýshy inim Baqytjan Qanapııanov Almatydan astanaǵa kelgen saparynda maǵan ádeıi jolyǵyp, óziniń ótken jyly memlekettik syılyq alǵan, orys tilinde jarııalanǵan «Dostoıanıe dýshı» atty jyr jınaǵy men eki tomdyq shyǵarmalar kitabyn syılap ketti. Baqytjan meniń baıaǵydan biletin inilerimniń biri edi. Ári ol Qazaqstandaǵy baspa oryndarynda kóp jyl qyzmet atqarǵanyn aıtpaǵanda, biraz jyl Máskeýde shyǵatyn «Lıteratýrnaıa gazetanyń» Qazaqstandaǵy tilshisi bolǵan. Maǵan syılaǵan kitaptarynda onyń ishki jan syrlary, jýrnalıstik qyrlary da aınadaǵydaı kórinedi eken. Jáne bir ereksheligi Baqytjan da Oljas Súleımenov aǵasy sııaqty orystildi aqyn ǵoı. Onyń kitaptaryn oqyǵanda 70-jyldardyń aıaǵynda jazylǵan bir óleńi erekshe nazar aýdardy. Bylaı depti ol:
Bala kezden shyqty tilim basqasha,
Qostildilik ishke kirdi astasa.
Ekijúzdi bolyp ketsem, durys-aý,
Ondaı júzdi tilip-tilip tastasa.
Igerip em qulaqqa jat bir tildi,
Babalarym bóldi jıi uıqymdy.
Arýaqtar mysqyldaıdy túsimde,
Bóten eldiń tutqynyndaı sıqymdy.
Sol kezderde babalarǵa syıynyp,
«Keshir meni», – dep ótinem ıilip.
«Tartpaı týǵan urpaǵymsyń tegińe»,
Deıtin syndy olar maǵan kúıinip.
Shaǵyn ǵana óleńde ata-babasynyń jerinde týyp ósse de ana tilinen maqurym qalǵan tutas bir urpaqtyń ishki zary, qınalystary shynshyldyqpen kórinis tapqan. 70-shi jyldardyń aıaǵynda jazylǵan osy óleń 1986 jylǵy Almatydaǵy Jeltoqsan oqıǵalarynan keıin dúnıege jańa kelgendeı bolyp, avtordy «ultshyl» atandyryp, aıqaı-shý, dúrbeleń týǵyzyp jibergeni aıtylady kitapta. B.Qanapııanovtyń shyǵarmalarymen tanysqan adam onyń poezııada bolsyn, jýrnalıstik qyzmetinde bolsyn tek shynaıy shyndyqty jazatynyna kóz jetkizedi. Al bul – jýrnalıster úshin eń qajetti qasıet.
Bolat BODAÝBAI,
jazýshy, Qazaqstannyń eńbek sińirgen qaıratkeri,
Halyqaralyq «Alash» ádebı syılyǵynyń laýreaty
