Eki júzden asa jas túlektiń saltanatty sherýi ortalyq alańǵa kelip toqtaǵan soń rásim de bastaldy. Aıtpaqshy, búgingi sharany respýblıka jurtshylyǵy onlaın rejımde tamashalady. Sondaı-aq ómirge joldama alýǵa daıyn leıtenanttar ózderiniń arýlarymen birge ortaǵa shyǵyp, dóńgelene bılep, bilim ordasynyń maqtanyshtary – qoıan-qoltyq jekpe-jeginiń sheberleri óner kórsetti.
Rásimniń negizgi bólimin ashqan UQK Tóraǵasynyń orynbasary – Shekara qyzmetiniń dırektory general-leıtenant D.Dilmanov jas leıtenanttardy alda kútip turǵan shekaranyń ómiri aýyrdyń asty, jeńildiń ústimen júrýdi talap etetinin, bul úshin tabandylyq pen shydamdylyq, Otanymyzǵa degen sheksiz súıispenshilik jáne patrıottyq rýh qajet ekenin aıtty.
Bıyl shekarashylardyń oqý ordasyn 200-den asa leıtenant bitirip otyr. Olardyń ishinen 20 shaqty túlek akademııany qyzyl dıplomǵa aıaqtady. Sondaı-aq jas ofıserlerdiń ishinen sportta joǵary nátıje kórsetkeni úshin «sport sheberligine úmitker» ataǵyna, túrli razrıadtarǵa qol jetkizgen 23 sportshy shyqty.
Osydan keıin akademııanyń Jaýyngerlik Týymen qoshtasý úshin minberdiń aldyna leıtenant Temirlan Baıgeldi shaqyryldy. Sóıtip, leıtenanttar úshin jan tebirenterlik sát te týdy. Tylsym tynyshtyq ornady. Jaýyngerlik Týdy súıýshiniń árbir qımylyn soǵylǵan barabannyń «buıryǵy» arqyly birdeı ári múltiksiz qaıtalaǵan leıtenanttar bastaryndaǵy jasyl kúnqaǵarlaryn qoldaryna alyp, ózderine tórt jyl boıy bilim berip, shekarashylyq sheberlikterin shyńdap shyǵarǵan akademııanyń aldynda sońǵy márte tize búkti.
Aıta keteıik, UQK Shekara akademııasy bıyl óziniń 90 jyldyq mereıtoıyn atap ótpek. Ǵasyrǵa jýyq ýaqyttyń ishinde osy joǵary oqý ornynyń 300-den astam túlegi general degen joǵary áskerı shenge ıe boldy. Otan qorǵaý jolyndaǵy janqııarlyq erligi men qaısarlyǵy úshin 40-tan astam shekarashy ofıser Keńester Odaǵynyń Batyry atandy.
Tamara DÁÝLETBAEVA.
UQK Shekara qyzmetiniń zapastaǵy podpolkovnıgi
