18-týrǵa josparlanǵan jeti kezdesýdiń alǵashqy úsh matchy jeksenbi kúni ótti. Petropavldaǵy Ortalyq stadıonda uıymdastyrylǵan oıynda jergilikti «Qyzyljar» men elordanyń «Astana» klýby kezdesip,
matchy alań ıeleriniń paıdasyna aıaqtaldy – 3:2. О́tken týrda «Astana Arenada» ótken básekede astanalyqtar óz alańynda «Ordabasydan» jeńilip, jankúıerleriniń aldynda uıatty bolyp edi. Sol qatelikterin jýyp-shaıýy úshin bul oıynda elimizdiń alty dúrkin chempıondaryna qalaıda syrt alańda jeńiske jetý mańyzdy bolatyn. Alaıda bıylǵy birinshilikti joǵary dárejede ótkizip jatqan «Qyzyljar» fýtbolshylary qarsylastaryna úsh upaıdy ońaı ustata qoımaıtynyn oıyn basynda-aq birden ańǵartty. Kezdesýdiń 3-mınýtynda ýkraınalyq jartylaı qorǵaýshy Maksım Drachenko esep ashyp, jergilikti jankúıerlerdiń qýanyshyna bólendi. Stadıonǵa jınalǵan kórermender birinshi golǵa qýanyp bolamyn degenshe 9-mınýtta «Qyzyljardyń» taǵy bir ýkraınalyq oıynshysy Iýrıı Býshman kezdesýdiń esebin de, jankúıerlerdiń qýanyshyn da eseleı tústi – 2:0. «Ordabasymen» ótken oıyndaǵydaı ssenarıı qaıtalanǵandyqtan ba eken, 10 mınýtta eki gol ótkizip alǵan «Astana» oıynshylary abdyrap qaldy. Sóıtip birinshi taımda elordalyq klýbtyń shabýylynan sán, qorǵanysynan mán ketti.
Úzilis kezinde bas bapker Andreı Tıhonovtan tıisti aqyl-keńes alyp, alańǵa shyqqan «Astana» jigitteri tóreshiniń ysqyryǵyn estı sala alǵa qaraı umtyldy. Maqsattary – ekinshi taımnyń basynda qalaı da tarazy basyn teńestirip alý. Nátıjesinde oıynnyń 51-mınýtynda qonaqtar óz degenderine jetip, esep aıyrmasyn qysqartty. Gol avtory – Islambek Qýat. Bul jartylaı qorǵaýshynyń «Astana» sapyna araǵa jeti jyl salyp qaıta oralǵannan keıingi tuńǵysh goly boldy. Degenmen astanalyq jankúıerlerdiń qýanyshy uzaqqa sozylmady. Matchtyń 68-mınýtynda chernogorııalyq Darko Zorıch mergendigimen kózge túsip, esepti 3:1-ge jetkizdi. 86-mınýtta Abat Aıymbetov esep aıyrmasyn qysqartqanymen, «Astanaǵa» jeńis syılaı almady.
Osylaısha Petropavldyń «Qyzyljary» óz tarıhynda tuńǵysh ret elordalyq klýbtan basym tústi. Buǵan deıin eki ujym jasyl alańda 9 ret kezdesip, barlyǵynda «Astana» fýtbolshylarynyń mereıi ústem bolǵan edi. Osy jeńisinen keıin «Qyzyljar» 25 upaı jınap, týrnır kestesinde besinshi orynǵa kóterildi. Al «Astana» 38 upaımen ázirshe ekinshi orynda tur.
Al ótken týrda «Astananyń» jeńisti serııasyna núkte qoıǵan «Ordabasy» bul týrda óz alańynda Taldyqorǵannyń «Jetisýyn» qabyldap, qarsylas komandanyń qaqpasyna jaýapsyz úsh gol soqty. Bıylǵy chempıonattyń úzdik surmergeniniń biri Joao Paýlo men komanda kapıtany Erkebulan Tuńǵyshbaev jaraqattaryna baılanysty bul oıynda «Ordabasyǵa» kómektese almady. Soǵan qaramastan alań qojaıyndary iri eseppen jeńiske jetti.
Kezdesýdiń 13-mınýtynda shabýylshy Sergeı Hıjnıchenko «Ordabasy» klýbyn alǵa shyǵarsa, birinshi taımnyń sońyna taman komandalasy Mırzad Mehanovıch esepti 2:0-ge jetkizdi. Sondaı-aq bosnııalyq fýtbolshy ekinshi taımda ekinshi golyn soǵyp, oıynnyń núktesin qoıdy. «Ordabasy» úshin bul – QPL-daǵy qatarynan ekinshi jeńis. Osy jeńistiń arqasynda shymkenttikter týrnır kestesinde 4-orynǵa kóterildi. 10 upaımen sońǵy orynda turǵan «Jetisý» qatarynan tórtinshi matchta jeńilip qaldy. Jalpy, bul taldyqorǵandyqtar úshin chempıonattaǵy 13-shi jeńilis.
Sonymen qatar qaraǵandylyq «Shahter» 18-týrda «Aqtóbeni» qabyldap, bir dop aıyrmasymen jeńiske jetti. Bul – «Shahter» klýbynyń bıylǵy chempıonattaǵy qatarynan besinshi jeńisi. Qaraǵandylyqtarǵa úsh upaı syılaǵan matchtaǵy jalǵyz goldy oıynnyń 67-mınýtynda Jan-Alı Pırýz soqty.
