Túrkimenstan kóshbasshysy óz eliniń biraz ýaqyttan beri túrki memleketterimen tyǵyz baýyrlastyq qatynastar júrgizip kele jatqanyn jáne ózin túrki áleminiń ajyramas múshesi sanaıtynyn jetkizdi. Ol bul baılanys Túrkimenstan men Túrki keńesi arasyndaǵy tyǵyz yntymaqtastyqqa qol jetkizýge berik negiz bolatynyna senim bildirdi.
О́z kezeginde Túrki keńesiniń Bas hatshysy Prezıdent Berdimuhamedovke alǵysyn bildirip, Túrkimenstan árdaıym túrki áleminiń ajyramas bóligi bolǵanyn jáne tamyry tereńde jatqan ortaq tarıhtyń, mádenıet pen muranyń qazynasy ekenin aıtty.
B.Ámireev Túrki keńesi baýyrlas Túrikmenstannyń ekonomıkalyq, áleýmettik jáne saıası ómirdegi mańyzdy isterdi qalaı oryndaıtynyn jáne halyqaralyq arenada laıyqty orynǵa ıe ekenin de atap ótti. Túrkimenstan men oǵan múshe memleketter arasyndaǵy damyǵan ekijaqty qatynastardy joǵary baǵalaıtynyn da jasyrmady.
Bas hatshynyń aıtýynsha, Túrki keńesi - Túrki álemindegi yntymaqtastyqty odan ári nyǵaıtý úshin berik negiz bolady.
Baǵdat Ámireev Túrkimenstannyń ózara baılanysty arttyrý jáne turaqty damýdy, ekonomıkalyq ósý men turaqtylyqty saqtaý maqsatynda múshe eldermen yntymaqtastyqta da, alys-jaqyn memlekettermen jáne halyqaralyq uıymdarmen júrgizetin dıalog prosesterine de belsendi qatysyp kele jatqanyn tilge tıek etti.
Sondaı-aq, ol Prezıdent Berdimuhamedovke Túrki keńesiniń qazirgi qyzmeti men atqarylyp jatqan jumystary týraly baıandady.
2021 jyldyń qarashasynda, Stambulda ótedi dep josparlanǵan Túrki keńesiniń VIII sammıtine daıyndyǵy týraly da aıtyp berdi.
B.Ámireev bul sammıtte qabyldanatyn mańyzdy sheshimderdiń Túrki keńesi aıasyndaǵy yntymaqtastyqtyń joǵary deńgeıge kóterilýine áser etetinin jáne túrki álemindegi qatynastardyń myqty transformasııasyn belgileıtinin basa aıta otyryp, Túrkimenstan Prezıdentiniń bul mańyzdy sammıtke qatysýy - túrki áleminiń birligin kórsetetinin atap ótti.
Túrkimenstan Prezıdenti Túrki keńesiniń eki tarapty qyzyqtyratyn salalardaǵy jobalaryna ári qaraı da Túrkimenstannyń qatysýǵa daıyn ekenin bildirdi.
Prezıdent Berdimuhamedov pen Bas hatshy Ámireev Túrkimenstanǵa Uıymda erekshe mártebe berý maqsatynda Túrikmenstan men Túrki keńesiniń bolashaqtaǵy yntymaqtastyǵyn talqylady.
Sondaı-aq, túrkimen kóshbasshysy men bas hatshysy qazirgi jahandyq jáne halyqaralyq kún tártibindegi keıbir máseleler boıynsha da pikir almasty.
