«Osy ýaqyt ishinde 119 zań jobasyn qaraýǵa qatystym. Olardyń maqsaty - qoǵamdy demokratııalandyrý, jergilikti ózin-ózi basqarýdy kúsheıtý, ekonomıkany damytý, pandemııa jaǵdaıynda halyqty áleýmettik qorǵaý, sybaılas jemqorlyqqa qarsy kúresti kúsheıtý, ekologııany qorǵaý jáne t. b.
Osy zańdardyń kópshiligi Prezıdenttiń tapsyrmasy boıynsha jáne tikeleı Parlament depýtattarynyń usynysymen (májilismender men senatorlardyń birlesýimen) ázirlengenin atap ótkim keledi.
Zańdy qabyldaý - bul jaýapty is jáne munda qatelesýge bolmaıdy, sebebi zań qabyldaýda bir osaldyq bolsa, sońy eldegi kúrdeli problemalarǵa aınalady.
Sondyqtan zań jobalarynyń «tazalyǵyna» jaýap beretin Senatqa ár ýaqytta úlken jaýapkershilik júkteledi», deıdi ol.
Aqylbek Kúrishbaevtyń sózinshe, 10 aı ishinde tolyqtyrýlar men ózgerister engizilgen 15 zań jobasy Senattan Májiliske qaıta qaraýǵa jiberilgen. Olardyń ekeýin naqtylaýǵa tikeleı bastamashy bolǵan.
«Men elimizdiń iri qalalarynda sý qorǵaý beldeýleriniń kólemin qysqartýǵa qarsy boldym, óıtkeni bul eldiń sý resýrstaryn saqtaýda eleýli máselelerge ákep soqtyrar edi. Sondaı-aq, qoǵamda alańdaýshylyq týdyrǵan orman ósirý úshin sheteldikterge jer ýchaskelerin 25 jylǵa jalǵa berý týraly Jer zańnamasynyń normalaryna qarsy pikir bildirdim.
Árıne, Májilis qabyldaǵan jáne Úkimetpen kelisilgen zań jobasyna qarsy shyǵý ońaı emes. Eger óz usynysyńnyń sebep-saldaryn dáleldeı almasań, «aq qarǵa» atanatynyń belgili ǵoı. Bul úshin, árıne, soqyrǵa taıaq ustatqandaı naqty dálelder qajet.
Depýtattardyń kelesi mańyzdy mıssııasy - atqarýshy bılik jumysynyń tıimdiligin baqylaý. Parlamenttiń birneshe otyrysy aıasynda Premer-Mınıstrge jáne onyń orynbasarlaryna, esep komıtetiniń tóraǵasyna 7 depýtattyq saýal joldap, onda bılik tarapynan sheshilmeı otyrǵan aýyl turǵyndarynyń jeke maldaryn jaıylymdarmen qamtamasyz etý boıynsha, azyq-túlik baǵalaryn turaqtandyrý boıynsha Memlekettik organdardyń jumysyndaǵy kemshilikter men sybaılas jemqorlyq áreketteri týraly, AО́K-ni statıstıkalyq eseptilikke tirkeý týraly, joǵary oqý oryndaryn basqarýdy demokratııalandyrý qajettigi jóninde, veterınarııadaǵy daǵdarys, agrarlyq ǵylymdy qarjylandyrýdaǵy irkilister, sheteldik tuqymdardy sýbsıdııalaýǵa memlekettik qarajattyń tıimsiz jumsalýyna qatysty suraqtardy kóterdim.
Bul hattardy jazbasha joldap qana qoımaı, Premer-Mınıstrdiń, Premer-Mınıstr orynbasarynyń, Bilim jáne ǵylym, Aýyl sharýashylyǵy mınıstrleriniń jeke qabyldaýynda bolyp, «tet-a-tet» formatta olarǵa óz usynystarymnyń mánin túsindirip berdim.
Sonymen qatar, Senat otyrystarynda, Parlamenttik tyńdaýlarda EAEO, ınflıasııa, azyq-túlik qaýipsizdigi, sý resýrstaryn basqarý, ekologııany qorǵaý, ǵylymdy damytý jáne t. b. máseleler týraly 11 ret óz ustanymdarymdy alǵa tartyp, sóz sóıledim.
Kóterilgen máselelerge nazar aýdartý úshin, basty gazetterde 12 maqala jarııalap, ekonomıka, bilim berý, agrarlyq ǵylym, jer jáne sý resýrstary men memlekettik basqarý júıesiniń problemalary boıynsha telearnalarǵa 21 ret suhbat berdim (bular veb-saıttarda, áleýmettik jelilerde jarııalanǵan kóptegen materıaldarymdy eseptemegende). Osy múmkindikti paıdalanyp, jýrnalısterge qoldaý kórsetkenderi úshin alǵys aıtqym keledi.
Endi osy jumystardyń nátıjesi týraly aıtyp óteıin. О́kinishke qaraı, kóptegen usynystarym «qaǵaz kúıinde» qaldy, kóptegen depýtattyq saýaldaryma «úırenshikti syrǵytpa» jaýaptar aldym. Men túsinemin, árıne, bıýdjette problemalar kóp, ýaqytty qajet etetin sheshimder de bar. Biraq, tipti, depýtattar usynǵan zańǵa táýeldi aktilerge (mınıstrdiń buıryǵyna) ózgerister engizý birneshe aı boıy qajet etiledi eken... Damyǵan elderde Parlament depýtattarynyń usynysyna osyndaı selqos kózqarasty kórý ekitalaı shyǵar.
Prezıdent bastamashylyq etken zańdarmen jumys jasaı otyryp, men Memleket basshysynyń halyqaralyq tájirıbesi mol kóshbasshy retinde memleketimizdi zańnamalyq negizde damytýdyń jańa modelin qalyptastyrýǵa baǵyttap kele jatqanyn, qoǵamdy demokratııalandyrýǵa, ekonomıkany damytý boıynsha jańasha basymdyqtardy kórdim.
Endi osy strategııany júzege asyrý mańyzdy. «Zań álsiz bolsa da, jaqsy sheneýniktermen eldi basqarýǵa bolady, al sheneýnikter álsiz bolsa, eń jaqsy zańdar da kómektespeıdi» degendeı, bizge qazir jumysty sapaly, jaqsy oryndaýshylar jetispeıdi. Al mundaı basqarý júıesin qalyptastyrý úshin, yqpaldy Parlament pen esep beretin Úkimettiń bolýy óte mańyzdy!», deıdi Aqylbek Kúrishbaev.
