Qoǵam • 03 Shilde, 2021

Nur Otan Eńbek vıse-mınıstrin partııalyq jaýapkershilikke tartady

51 ret kórsetildi

«Nur Otan»-nyń Partııalyq baqylaý komıtetiniń kezekti otyrysynda jumyspen qamtýdyń jalǵan faktileri, jumyspen qamtý ortalyqtarynyń esebindegi aıla-sharǵylar, bıýdjettik nesıelerdi maqsatsyz paıdalaný,  «Eńbek» nátıjeli jumyspen qamtýdy jáne jappaı kásipkerlikti damytý memlekettik baǵdarlamasynyń oryndalý máseleleri talqylandy, dep habarlaıdy Egemen.kz. 

Komıtet múshesi, Májilis depýtaty Álııa Ábsemetovanyń aıtýynsha, baǵdarlamany júzege asyrý úshin sońǵy 4 jylda respýblıkalyq bıýdjetten shamamen 600 mlrd. teńge bólingen. Alaıda baǵdarlamanyń nysanaly ındıkatorlary bir-birine uqsap qana qoımaı, kóbinese bir-birin aına qatesiz qaıtalaıdy. Bul, árıne, qazyna qarjysyn bosqa shashý.

Sonymen qatar, Komıtet músheleri azamattardy jumysqa tek qaǵaz júzinde qabyldaý faktilerin anyqtady. 2019 jyly 118,8 myń azamattyń jumyspen jalǵan qamtylǵany belgili boldy. Bul turaqty jumysqa ornalasqandardyń jalpy sanynyń 31%-yn quraıdy.

«Máselen, jumys berýshiler óz qyzmetkerlerin jumystan shyǵaryp, olardy jumyspen qamtý ortalyqtary arqyly áleýmettik jumys oryndaryna qaıta jumysqa alady. Nátıjesinde adamdar burynǵydaı jumysyn isteı beredi, biraq memleket olardyń tabysynyń 35%-n sýbsıdııalaıdy. Osylaısha, jumys berýshi ózinen jaýapkershilik pen shyǵyndardy alyp tastaıdy», dedi Álııa Ábsemetova.

Nur Otan baspasóz qyzmeti jappaı kásipkerlikti damytýda da jaǵdaı máz emes ekenin jazady. Partııalyq baqylaý komıtetiniń aqparaty boıynsha, prokýratýra organdary 1,3 mlrd. teńge nesıe negizsiz berilgen 341 faktini, sommasy 555,3 mln. teńgeni quraıtyn bıýdjettik nesıe maqsatsyz paıdalanylǵan 180 faktini anyqtady.

«Kásipkerlerdiń basym bóligi bıýdjettik nesıe alǵannan keıin birden óz qyzmetin toqtatady. Sonymen qatar, tıisti baqylaýdyń bolmaýy saldarynan adamdar bıýdjettik nesıe esebinen basqa bankterdegi qaryzdaryn jaýyp, úı men kólik satyp alady», deıdi Á.Ábsemetova.

«Eńbek» baǵdarlamasy aıasyndaǵy jastar tájirıbesiniń tıimdiligi de mardymsyz. Mamandyq boıynsha bıýdjet esebinen oqytylǵandardyń 25%-y ǵana jumysqa ornalasady.

Komıtet tóraǵasy, Májilis depýtaty Artýr Platonovtyń aıtýynsha, jumyspen qamtý sııaqty mańyzdy salada jaýapsyzdyq pen bıýrokratızm faktileriniń sanyna jete almaısyń.

«Osy salaǵa jaýapty ortalyq jáne jergilikti bılik organdarynyń laýazymdy tulǵalary kóbine kórsetkishterdiń sońyna túsip, naqty ahýaldyń ózderi ádemilep «boıaǵan» esepterden aıyrmashylyǵy kóp ekenin baıqamaıdy», dedi Artýr Platonov.

О́z kezeginde Eńbek jáne halyqty áleýmettik qorǵaý mınıstri Serik Shápkenov sońǵy 4 jylda «Eńbek» baǵdarlamasy aıasynda turaqty jumysqa 1,4 mln. astam adam ornalastyrylǵanyn, beıresmı jumyspen qamtylǵandar sany 400 myń adamǵa qysqarǵanyn, al jumyssyzdyq deńgeıi 4,9% deńgeıinde saqtalǵanyn habarlady. Sondaı-aq, mınıstr memlekettik baǵdarlamany jetildirý boıynsha vedomstvo atqaryp jatqan sharalar týraly aıtyp berdi.

«Jumyspen qamtýdyń jalǵan faktilerimen kúresý úshin osy jyldyń mamyr aıynan bastap jumyssyz retinde tirkelý, bıýdjettik nesıe alýǵa ótinim berý jáne ózge de qyzmetter elektrondyq eńbek bırjasy arqyly onlaın formatta kórsetiledi. Al azamattardyń eńbek mobıldiligine yqpal etý úshin kóshýge beriletin sýbsıdııa mólsheri 35-ten 70 AEK-ke deıin ulǵaıtyldy»,  dedi mınıstr.

Otyrys qorytyndysy boıynsha Partııalyq baqylaý komıteti Eńbek mınıstrligi men Ulttyq ekonomıka mınıstrliginiń «Eńbek» baǵdarlamasyn júzege asyrý bóligindegi jumysyn qanaǵattanarlyqsyz dep tanýǵa qaýly etti. Eńbek vıse-mınıstri Erjan Birjanovty «eskertý» túrindegi partııalyq jaýapkershilikke, sondaı-aq Qaraǵandy jáne Túrkistan oblystaryndaǵy jumyspen qamtýdy úılestirý jáne áleýmettik baǵdarlamalar basqarmalarynyń basshylary Ásem Júnispekova men Ásııa Temirbaevaǵa «eskertpe» túrindegi partııalyq jaza qoldaný usynyldy.

Budan basqa, Komıtet Eńbek jáne Ulttyq ekonomıka mınıstrlikterine jumyspen qamtý baǵdarlamasyn baǵalaý ádistemesin ázirleýdi jáne bekitýdi, ony sarapshylyq jáne ǵylymı ortada talqylaýdy, sondaı-aq, jyl saıyn baǵdarlamany júzege asyrý nátıjeleriniń ashyq qoljetimdi kózderde jarııalanýyn qamtamasyz etýdi usyndy.

Sońǵy jańalyqtar

Qazaqstanda et qymbattady

Qoǵam • Búgin, 15:10

Elimizde kıik sany kóbeıip keledi

Qazaqstan • Búgin, 14:41

ShQO-da elikti atqan brakoner sottaldy

Qoǵam • Búgin, 11:20

Uqsas jańalyqtar