Kaspıı teńizine aqqýlar kele bastady. Kún sýyqta jetetin jyl qustaryn tamashalaýǵa jurtshylyq asyǵýda. Bul týraly «Qazaqstan» telearnasy habarlady.
Tula boıyna sulýlyq tunǵan qus patshasy - aqqý kirshiksiz tazalyqtyń, qylaýsyz páktiktiń sımvoly. Aqqýdyń salmaǵy - 7-13 kılo. Qanatynyń qulashy - 1,5 metr. Erekshe uzyn da ásem moıynyn tik ustaıdy. Sarǵysh qyzyl tumsyǵynyń ushy qara tústi. Mundaı sulýlyqty kórý úshin at aryltyp alystan keletinder kóp.
Aqqýlar 3-7 jumyrtqa salady. 40 shaqty kúnde balapan órgizedi. Aqqýdyń balapanyn «kógildir» dep ataıdy. Anasyndaı appaq bolmasa da, kógildirdiń kórkemdigine kóz toıattaıdy. Olar 3-4 túlep baryp, aqqýǵa aınalady. Kógildiri 4 jasqa deıin ata- anasynyń janynda júredi. Atalyǵy - «sapar» delinedi. Aqqýlar 30-40 jyl ómir súredi eken.
Qus bitkenniń tóresi - aqqý óle-ólgenshe bir-birine serik bolady. Syńarynan aırylsa ómir baqı jalǵyz ótedi. Olar sonysymen de erekshe. Aqqýlar 8,5-9 myń metr bıiktikke deıin kóterilip, saǵatyna 90-100 shaqyrym jyldamdyqpen ushady. «Men Oraldan keldim. О́te ádemi qus eken. Byltyr aqqýlar keshteý keldi dep estidim. Qazir óz kózimmen kórip, sulýlyǵyna tamsanyp turmyn», - deıdi qala qonaǵy Petr Sokolov.
Aqqýlar týraly án de, jyr da, kúı de jetkilikti. Chaıkovskııdiń «Aqqý kóli», Muqaǵalıdiń «Aqqýlar uıyqtaǵanda», Nurǵısanyń «Aqqý» atty shyǵarmalary kıeli qusqa degen adamzat súıispenshiligin ańǵartyp tur.
Baqytbek Keneshuly.
Derekkóz: «Qazaqstan» telearnasy
Foto: «Qazaqstan» telearnasy.
