«Astana Opera» teatrynyń dırektory Qazaqstannyń eńbek sińirgen qaıratkeri Ǵalym Ahmedıarov opera akademııasyn ashýdyń mańyzyn atap ótti. Onyń aıtýynsha, álemde kóptegen áıgili teatrdyń ózindik opera akademııasy bar. Onda jas vokalısterge kásibı turǵydan jetilýge múmkindik beriledi ári úlken sahnada jumys jasaýǵa daıyndaıdy.
«Búginde Qazaqstanda kásibı vokal mektepteri bar, ol jerde operalyq án aıtý ónerin úıretedi. Bizdiń akademııamyzdyń biregeıligi – konkýrstyq tyńdaý nátıjeleri boıynsha akademııaǵa túsken jas ártister vokaldan sabaq alýdan bólek, eki jyl boıy túrli pánderdi oqıdy. Budan bólek, jas vokalısterdiń bolashaǵy jarqyn: álemniń tanymal ánshileri men óz qyzmetiniń aıasynda mol tájirıbesi bar tálimger ustazdardy sheberlik sabaǵyn ótkizýge shaqyramyz. Demek bir mezette óz beıininiń túrli salalarynda kásibı ósý múmkindigine ıe bolady», deıdi ol.
Teatr dırektory bilim berý baǵdarlamasyna shet tilin úırený, sahnalyq qımyl-qozǵalys pen akterlik sheberlik engiziletnin aıtty. Sebebi klassıkalyq repertýardyń aıtarlyqtaı bóligi ıtalıan tilde jazylǵan.
Sondaı-aq, jas ártister teatr qoıylymdaryna qatysyp, ról somdaı alady. «Astana Opera» Kameralyq zaly sahnasynda túrli konsert uıymdastyrý da qarastyrylǵan. Astana Opera Halyqaralyq opera akademııasy –joǵary bilikti mamandardan bilim ala otyryp, jas opera ánshilerine sheberlik deńgeıin arttyrýǵa múmkindik beretin baǵdarlama.
Teatr baspasóz qyzmetiniń habarlaýynsha, vokal akademııasynyń saltanatty ashylýy 4 shilde kúni «Astana Opera» teatrynyń Úlken zalynda ótedi.
Spıkerdiń aıtýynsha, ashylý saltanatyna Marıandjela Sısılııa, maestro Djýzeppe Akýavıva, Rıkkardo della Shýkka, Mattıa Rossı (Italııa), Lıbýshe Santorısova (Chehııa-Italııa), Badral Chýlýýnbaatar (Mońǵolııa), Saıan Isın (Qyrǵyzstan) sııaqty juldyzdardy shaqyrylǵan. Sondaı-aq qazir Germanııanyń opera teatrlarynda óner kórsetip júrgen Baýyrjan Ánderjanov te qatysady. Qazaqstandyq juldyzdar – Italııa Juldyzy ordeniniń ıegeri Medet Chotabaev, Qazaqstannyń eńbek sińirgen qaıratkeri, kóptegen sheteldik baıqaýlardyń laýreaty Jupar Ǵabdýllına, barıton Talǵat Musabaev, «Bolshaıa opera» televızııalyq jobasynyń jeńimpazy Saltanat Ahmetova, Aıgúl Nııazov, Azamat Jyltyrkózov jáne qazaqstandyq opera sahnasynyń tanymal tulǵalary ónerin tyńdarmanǵa pash etedi. Sonymen birge konsertke «Astana Opera» sımfonııalyq orkestri, hory jáne baleti qatysady.
