Tarysty bastalǵan kezdesýde jankúıerler goldy kóp kútken joq. Matchtyń 5 mınýtynda Larsennen pas alǵan dat jartylaı qorǵaýshysy Tomas Dıleını esep ashty. Budan soń da aıtarlyqtaı bolmasa da Danııa quramasynyń oıyndaǵy basymdyǵy baıqalyp turdy. Kasper Hıýlmand shákirtteri esepti eseleýge tyrysty jáne ol maqsatyna 42 mınýtta jetti. Urymtal sátte qajet jerden tabylǵan shabýylshy Kasper Dolberg quramasynyń basymdyǵyn arttyra tústi. Qos qurama úziliske 0:2 esebimen attandy.
Ekinshi taım bastala salysymen Chehııa quramasy belsendi shabýyldaýǵa kóshti. Nátıjesinde 49 mınýtta Patrık Shık esep aıyrmasyn qysqartty. Bul Shıktiń osy chempıonattaǵy besinshi goly. Osylaısha, cheh shabýylshysy goldar sany boıynsha Krıshtıaný Ronaldýmen teńesti. Sondaı-aq 2004 jylǵy Eýropa chempıonatynda 5 gol soqqan otandasy surmergen Mılan Baroshtyń da rekordyn qaıtalady.
59 mınýtta dat quramasy sapynda Dolbergtiń ornyna Poýlsen, Nerbordyń ornyna Damsgor shyqty. Alaıda jańa oıynshylardyń eshbiri Danııanyń úshinshi golyn soǵa alǵan joq. Esesine Kasper Shmeıhel de match sońyna deıin syr bermedi. Chehııa quramasy belsene uıymdastyrǵan birneshe shabýylyn sońyna deıin jetkize almady. Al keı sátte dat shabýylyn toıtarýǵa biraz ýaqyt jumsaýǵa májbúr boldy. Dopqa ıelik etý jáne pastyń dál berilýi turǵysynan Chehııa quramasy qarsylastarynan sál basym turdy. Degenmen bul azdaǵan basymdylyq olardyń esepte alǵa shyǵýyna múmkindik bergen joq. Ne bolmasa chehtar bul az-maz múmkindikti óz kádesine jarata almady degen durysyraq bolatyn shyǵar.
Danııa quramasy jartylaı fınalda Ýkraına – Anglııa jubynyń jeńimpazymen oınaıdy.
Eske sala keteıik, birinshi jartylaı fınal matchynda Ispanııa men Italııa kezdesedi. Ispandar penaltı serııasy arqyly Shveısarııa quramasynan basym tússe, Italııa quramasy Belgııany 2:1 esebimen jeńip ketken edi.
