Týrnır Qazaqstan Respýblıkasynda ulttyq sport túrlerin damytý arqyly salaýatty ómir saltyn qalyptastyrý qaǵıdattaryn nasıhattaý, jastardy ulttyq sport túrlerimen shuǵyldanýǵa tartý arqyly olardyń boıynda otansúıgishtik sezimdi qalyptastyrý, qazaq kúresin órkendetý arqyly ony ulttyq ıdeıa deńgeıine jáne halyqaralyq arenadaǵy bedelin kóterý maqsatynda ótkizildi. On jyl boıy úzdiksiz ótip, mıllıondaǵan kórermenderdiń súıikti jobasyna aınalǵan «Qazaqstan Barysy» týrnıri ulttyq qundylyqtardyń toǵysqan arnasy.
Týrnırdiń qurmetti qonaqtary retinde Qazaqstan Respýblıkasy Prezıdenti Ákimshiligi Basshysynyń birinshi orynbasary D.Abaev, QR mádenıet jáne sport mınıstri A.Raıymqulova jáne Nur-Sultan qalasynyń ákimi A.Kólginov qatysyp, balýandarǵa sáttilik tiledi.
Onynshy ret ótken básekege elimizdiń 14 oblysynan, Almaty, Shymkent, Nur-Sultan qalalarynda irikteýden ótken 36 úzdik balýan qatysty, onyń ishinde kúshtik qurylymdar arasynda ótken «Ásker Barysy» týrnıriniń jeńimpazdary da bar. Qatysýshy balýandardyń 11-i jobada tuǵysh ret baq synady. Balýandar Qazaq kuresi Assosıasııasy bekitken erejege saı kúresti.
Týrnırdiń eń aýyr salmaqty balýany E.Qajybaev 155 keli bolsa, eń jeńil salmaqta Ersultan Muzapparov 90 keli boldy. Aqtyq beldesýde Shyǵys Qazaqstan oblysy men Jambyl oblysynyń balýany kezdesip, baby men baǵy teń túsken Dáýren Nuralınov (ShQO) – «Qazaqstan Barysy» atandy. Al kúmis belbeýdi Ǵalymjan Qyryqbaı ıelense, qola belbeýdi mańǵystaýlyq Nurdáýlet Jarylǵapov jeńip aldy.
Shara aıasynda sporttyq saıystarmen qatar R.Stamǵazıev, Q.Rahym, «Alataý serileri» etno-toby án shyrqap, tikeleı efırde ulttyq kúres jankúıerleriniń kóńilin kóterdi.
Týrnırdi QR Mádenıet jáne sport mınıstrligi, «Nur-Otan» partııasy, Nur-Sultan qalasy ákimdiginiń qoldaýymen Qazaq kuresi Assosıasııasy jáne «Qazaqstan Barysy» qazaq kúresin qoldaý jáne damytý qory uıymdastyrdy. Sondaı-aq, «Qazaqtelekom» AQ men «Magnum» Qazaqstandaǵy №1 saýda-bólshek jelisi demeýshilik jasady.
Onynshy Barysqa 25 000 000 teńge jáne altyn belbeý men altynnan quıylǵan aýyspaly «taıtuıaqty» Qazaq kuresi assosıasııasy birinshi vıse-prezıdenti Samat Ábish tabystady. Ekinshi oryn ıegeri Jambyl oblysynyń balýanyna 5 500 000 teńge jáne kúmis belbeý berildi. Úshinshi oryn alǵan Mańǵystaý oblysynyń balýany Jarylǵapov Nurdáýlet 1 800 000 teńge, sáıkesinshe qola belbeýmen marapattaldy.
Balýandardy marapattaý rásimine Qazaqstannyń jaýyngerlik óner assosıasııasynyń prezıdenti Ánýar Sadyqulov, Qazaqstannyń jaýyngerlik óner assosıasııasynyń birinshi vıse-prezıdenti Málik Mýrzalın, Qazaq kuresi assosıasııasy bas hatshysy,»Qazaqstan Barysy» qazaq kúresin qoldaý jáne damytý qoǵamdyq qory qamqorshylyq keńesiniń tóraǵasy Qýanyshbek Esekeev, Nur-Sultan qalasy dene shynyqtyrý jáne sport basqarmasynyń basshysy Samat Erǵalıev jáne «Qazaqstan Barysy» jobasynyń bas demeýshisi, Magným saýda jelisiniń basqarma tóraǵasy Azamat Osmanov qatysyp, jarys jeńimpazdary men júldegerlerin arnaıy marapattady.
