El astanasy – Nur-Sultan qalasy óziniń 24 jyldyq tarıhynda álemniń ozyq elderi kóshbasshylarynyń basyn qosatyn saıası, mádenı ortalyqqa aınaldy. 2010 jyly Elordada ótken Eýropalyq qaýipsizdik jáne yntymaqtastyq uıymynyń sammıti – sonyń aıqyn dáleli. Osy uıymǵa Qazaq eliniń tóraǵalyq etýi – burynǵy keńestik elder arasynda eń alǵash ret bolǵan saıası mańyzy zor oqıǵa ekenin aıtqan jón. Sondaı-aq Nur-Sultanda 2003 jyldan beri Álemdik jáne dástúrli dinder kóshbasshylarynyń sezi uıymdastyrylyp, ártúrli din ókili bas qosyp otyrady.
Elordamyz halyqaralyq saıası arenada óziniń ornyn qalyptastyryp, halyqaralyq qoǵamdastyq sanasatyn dárejege jetti. Kezinde IýNESKO Nur-Sultan qalasyn dúnıejúzindegi «Beıbitshilik qalasy» dep atady.
10-15 jyl burynǵy astana men qazirgi elordanyń mádenı áleýetin salystyrsaq, aıyrmashylyq joq emes. Elordamyz búginde rýhanı ortalyqqa aınala aldy dep nyq senimmen aıtýǵa bolady. Qazirgi tańda zııaly qaýym ókilderi men óner adamdary Nur-Sultan qalasyna kóship kelip, Elordamyzdyń rýhanı-mádenı damýyna óz úlesterin qosýda. Sońǵy jyldary qalada mádenı oshaqtar kóbeıe bastady. Máselen, Ulttyq akademııalyq kitaphana, «Qazaqstan» Ortalyq konsert zaly, «Astana Opera» memlekettik opera jáne balet teatry, Qazaqstan Respýblıkasynyń Tuńǵysh Prezıdenti – Elbasynyń kitaphanasy, Ulttyq mýzeı sııaqty kóptegen mádenı ortalyqtar paıda boldy.
Nur-Sultan qalasy saıasat pen rýhanııatta ǵana emes, sonymen qatar sportta da úlken jetistikterge jetti. Máselen, jyl saıyn Elordada kóptegen halyqaralyq sport is-sharasy uıymdastyrylyp, sonyń arqasynda sportqa qyzyǵýshylyǵy mol jastardyń sany artty. Nur-Sultan men Almaty qalalarynda tuńǵysh ret VII qysqy Azııa oıyndary ótip, sonyń nátıjesinde kóptegen jastar qysqy sport túrlerimen aınalysýǵa den qoıdy. Bul Nur-Sultannyń tek memlekettik qyzmetshilerdiń ǵana emes, sonymen qatar zııaly qaýym ókilderi men óner adamdarynyń qutty mekeni dáleldeıdi.
Bir sózben aıtqanda, elordamyz saıasatta, rýhanııatta jáne sportta óziniń mańyzdy ornyn qalyptastyryp úlgerdi. Munyń bári Táýelsizdigimizdiń arqasynda dep bilemin. Sondyqtan qazaqstandyqtardyń barlyǵy úshin Nur-Sultan – Otanymyzdyń júregi, Táýelsizdigimizdiń tiregi.
Barsha qazaqstandyqtardy Nur-Sultan qalasynyń kúnimen shyn júrekten quttyqtaımyn! Ár otbasyda bereke-birlik, elimizde tynyshtyq bolsyn!
Natalıa DEMENTEVA,
Parlament Májilisiniń depýtaty
