Elordany Almatydan Aqmolaǵa aýystyrý týraly sheshimdi Qazaqstan Respýblıkasynyń Joǵarǵy Keńesi 1994 jylǵy 6 shildede qabyldady. Astanany resmı kóshirý 1997 jylǵy 10 jeltoqsanda júzege asty. Prezıdenttiń 1998 jylǵy 6 mamyrdaǵy Jarlyǵymen Aqmola Astana bolyp ózgertildi.
Balalyq shaǵy balqarlyq, túrik, cheh, nemis balalarymen birge bir aýylda ótken, alǵashqy eńbek joly Karmetkombınattyń kópultty jumys ujymynda bastalǵan Elbasy Nursultan Ábishuly Nazarbaev úshin etnosaralyq kelisimniń mańyzdylyǵy, ıaǵnı basqa etnostar ókilderin óz ultynan bólip tastamaý, olardyń birligin qamtamasyz etý – astanany kóshirý ıdeıasyndaǵy basty faktorlardyń biri.
Ol kezde, toqsanynshy jyldardyń ortasynda bul ıdeıanyń júzege asatynyna senetinder kóp bolǵan joq, «jańa qala salý jáne ony ilgeriletý úshin kóptegen jyldar qajet bolady» dep sanaıtyndar da bar edi. Biraq olar jańylysty. Astana qysqa merzimde salynyp, el damýynyń sımvolyna aınaldy.
1998 jyldyń 10 maýsymynda Táýelsiz Qazaqstannyń jańa astanasynyń halyqaralyq tusaýkeseri ótti. Bul tarıhı oqıǵa Qazaqstannyń 2030 jylǵa deıingi damý Strategııasyn iske asyrýdyń bastaýy boldy.
Astanany kóshirý geosaıası, ekologııalyq, logıstıkalyq jáne basqa da kóptegen parametr boıynsha salmaqty sheshim boldy. Endi bul qala – dostyqtyń, etnosaralyq jáne konfessııaaralyq kelisimniń sımvoly. Elbasynyń strategııalyq jobasyn Prezıdent Qasym-Jomart Kemeluly Toqaev danalyqpen jalǵastyrý ústinde.
Biz elordanyń qalyptasý tarıhyndaǵy úlken ózgeristerdiń kýási bolyp otyrmyz. 2019 jyldyń 20 naýryzynda Qazaqstannyń jańa Prezıdenti Qasym-Jomart Toqaev óziniń ınaýgýrasııalyq sózinde Nursultan Nazarbaevtyń memleket úshin sińirgen eńbegin atap ótip, memlekettiń astanasyna Tuńǵysh Prezıdent Nursultan Nazarbaevtyń esimin berýdi usyndy. Onyń bastamasyn el Parlamenti qoldady.
Elordanyń ataýyn «Nur-Sultan» dep ózgertý kóregen sheshim boldy. Bul Tuńǵysh Prezıdenttiń eńbegi úshin rızashylyqtyń belgisi. Qazaqstan halqy Assambleıasynyń músheleri de bul sheshimdi tolyǵymen qoldady.
Elordanyń Eýropadan Azııaǵa aparatyn joldar qıylysynda ornalasýy óte tıimdi. Sebebi bul geografııalyq jaǵdaı onyń saıası, ekonomıkalyq, mádenı jáne rýhanı ortalyqqa aınalýynyń basty kepili.
Qazaqstannyń Tuńǵysh Prezıdentiniń ıdeıasymen qalanǵan jańa elorda qysqa merzim ishinde jalpyulttyq ıdeıa mártebesine ıe bolyp, jas memlekettiń Táýelsizdiginiń sımvolyna jáne jahandyq tabysyna aınaldy.
Búginde Nur-Sultan halyqaralyq mańyzy bar túrli forýmdar, kongrester men ózge de is-sharalar ótetin Eýrazııa keńistiginiń ortalyǵyna aınaldy. Elordada Álemdik jáne dástúrli dinder lıderleriniń sezderi, Astana ekonomıkalyq forýmy jáne ózge de mańyzdy halyqaralyq oqıǵalar turaqty túrde ótip keledi. Astanada Eýropadaǵy qaýipsizdik jáne yntymaqtastyq uıymynyń (EQYU) tarıhı sammıti, Shanhaı Yntymaqtastyq Uıymy (ShYU) men Islam Yntymaqtastyǵy Uıymynyń (IYU) mereıtoılyq sammıtteri ótti. 2011 jyldyń basynda respýblıkanyń elordasy VII Qysqy Azııa oıyndarynyń qatysýshylary men qonaqtaryn qabyldady, «EKSPO-2017» halyqaralyq kórmesi oıdaǵydaı ótti.
Nur-Sultan qalasynyń kún saıyn kórkeıip kele jatqan shahar ekendigin eskersek, onyń ósip-órkendep, az ýaqyt ishinde syrtqy kórinisi ishki mazmunyna saı bolyp, qanat jaıyp, shetten kelgendi de, el ishinen barǵandy da tamsandyratyn ǵajaıyp qalaǵa aınalǵany – bárimizge maqtanysh.
Bul kúni árbir qazaqstandyqty Nur-Sultan qalasynyń kúnimen quttyqtaımyn jáne barshańyzǵa beıbitshilik, jaqsylyq, amandyq jáne Otanymyz – Qazaqstan Respýblıkasynyń ıgiligi úshin jańa jetistikter tileımin!
Ilııas BÝLAROV,
Parlament Májilisiniń depýtaty
