О́rtti sóndirý boıynsha operasııany basqarý oblys ákiminiń orynbasary Serik Shaıdarovqa tapsyryldy.
«Oblys ákiminiń tapsyrmasy boıynsha Ulytaý aýdanyna ushyp keldik. О́rt oshaqtaryn qarap shyqtyq. О́rttiń paıda bolý sebepteriniń biri – qurǵaq naızaǵaı», dep málimdedi ol.
Sońǵy jetken málimetterge saı, órt oshaqtary tótenshe jaǵdaı departamentiniń baqylaýynda. Qazirgi ýaqytta maly ólgen nemese jaıylymdary órtenip ketken fermerlerge kelgen zalaldy baǵalaý jóninde komıssııa qurylǵan.
Jalpy, Ulytaý aýdanynda bir mezette 12 ot oshaǵy tirkelgen bolatyn. Sheńber jáne Amangeldi aýyldarynyń aýmaǵynda órt is júzinde sóndirildi. Al Baıqońyr aýylyndaǵy jaǵdaı qıyndaý bolyp tur.
Qazirgi ýaqytta Ulytaý aýdanyndaǵy úsh aýyldyq okrýgtegi dala órtterin joıýǵa 266 adam jáne 42 birlik tehnıka jumyldyryldy. Budan bólek, Qaraǵandydan kómekke 42 adam jáne 4 birlik tehnıka kómekke keldi. Janar-jaǵarmaı Jezqazǵan men Sátbaev qalalarynan qamtamasyz etilgen.
Qaraǵandy oblysy TJ departamentiniń bastyǵy polkovnık Murat Qatpanov órtti sóndirýge jergilikti atqarýshy organdardan, erikti órt sóndirý quramalarynan, sondaı-aq TJ departamentinen tehnıka jáne adam kúshteriniń jumyldyrylǵanyn málim etti.
«Qazirgi ýaqytta Pıoner aýylyna qaýip tónip turǵan joq. Eldi mekennen 3-5 shaqyrym qashyqtyqta janý oshaqtary boldy. Olar ınjenerlik tehnıkanyń kómegimen aýyzdyqtaldy jáne joıyldy. Eń kúrdeli ýchaskeler – qystaýlarǵa, fermerlik sharýashylyqtarǵa ottyń jaqyndaýy jedel túrde oqshaýlandyryldy jáne joıyldy», dep habarlady M.Qatpanov.
Degenmen, jumys áli de jalǵasyp jatqan jeke aýmaqtar bar. Oqıǵa oryndaryna qosymsha TJD qyzmetkerleriniń kelýi kútilýde. Olar eń qıyn jerlerge qoıylady.
Jergilikti atqarýshy organdar órt sóndirýdi uıymdastyrý boıynsha barlyq qajetti sharalardy qabyldap jatyr. Jalpy jaǵdaı baqylaýda ekenin aıta ketken lázim.
Qaırat ÁBILDA,
«Egemen Qazaqstan»
Qaraǵandy oblysy
