Álemdi qutqaratyn – vaksına ǵana

DDU-nyń dırektory Tedros Adhanom Gebreıesýstiń aıtýynsha, «Delta» shtamy­nyń taralýy – pandemııanyń qaýipti kezeńi. COVID-19 vırýsynyń bul mýtasııasy álem­niń 100-ge tarta memleketinde tirkelip otyr.

DDU-nyń basshysy álemdik qoǵam­dastyqty vaksına jetkizýge kómek kórsetýge, sol arqyly adamzatqa ortaq ujymdyq ımmýnıtet qalyptastyrýdy jyldamdatýǵa shaqyrdy.

DDU-nyń dabyl qaǵýy beker emes. Ger­manııada koronavırýstyń taralýy órship barady. Robert Koh atyndaǵy ınstıtýttyń málimetine súıensek, kúndelikti anyqtalǵan naýqastar sany myńǵa jaqyndap qalǵan. Jalpy, epıdemııa bastalǵannan beri 3,7 mıllıon germanııalyq naýqastanǵan.

Osy oraıda, Germanııa bıligi «Delta» shtamynan qorǵaný úshin kombınasııalanǵan ekpe alýǵa shaqyryp otyr. Germanııanyń vaksınalaý jónindegi turaqty komıssııasy  ártúrli tıpti – mRNK-vaksına jáne vektorly vaksınanyń eki túrin de saldyrýǵa resmı túrde keńes beredi. Bul eldiń densaýlyq saqtaý mınıstri Iens Shpan mundaı ekpe alý tásilin «asa utymdy» dep málimdedi.

Máskeýde indet saldarynan jansaqtaý bólimine túsken naýqastardyń sany kóbeıip barady. Eki aptanyń ishinde ókpeni jasandy jolmen jeldetý apparatyna qosylǵan naýqastar qatary eki esege deıin artty. Qazirgi ýaqytta Máskeýde 709 pasıent О́JJ apparatyna qosylǵan.

Reseı Ǵylym akademııasynyń aka­demıgi Vadım Pokrovskııdiń sózine súıensek, Reseıdegi koronavırýs pandemııasy el tur­ǵyn­darynyń toptyq ımmýnıteti qalyp­tasqan soń ǵana aıaqtalmaq. Oǵan alty aı ishinde qol jetkizýge múmkindik bar.

Fransııada 7 shildeden bastap sheteldik azamattar PTR testin tapsyrý úshin aqy tóleıtin bolady. Bul týraly Fransııa úkimetiniń ókili Gabrıel Attal málimdedi. PTR test úshin sheteldikter 49 eýro, al SARS-CoV-2 antıgenderine arnalǵan test úshin 29 eýro tóleýi kerek. Qazirgi ýaqytta Fransııada mundaı taldaýlar tegin jasalady.

Túrkııada ótken jyldyń qarasha aıynda SOVID-19 ınfeksııasynyń taralýyna baılanysty engizilgen komendanttyq saǵat 1 shildede óz kúshin tolyǵymen joıdy. Alaıda elde betperde kııý mindeti áli alynǵan joq. Sondaı-aq qoǵamdyq oryndarǵa barý úshin turǵyndarǵa QR-kod alý qajet. Túrkııanyń densaýlyq saqtaý mınıstrliginiń málimetinshe, pandemııa bastalǵannan beri elde 5,5 mln-ǵa jýyq turǵyn naýqastanǵan.

Latvııanyń memlekettik jedel medı­sınalyq komıssııasy koronavırýs ın­­feksııasynyń taralýyna baılanys­ty ja­rııalanǵan medısınalyq tótenshe jaǵ­daı­dyń kúshin joıdy. Bul týraly el Úkimetiniń baspasóz qyzmeti málimdedi.

Densaýlyq saqtaý mınıstri Danıel Pavlıýtstiń málimdeýinshe, aýrýhanalardaǵy jáne densaýlyq saqtaý júıesindegi jaǵdaı muqııat taldanyp, qanaǵattanarlyq dep tanyldy. Aýrýhanalarda indetke shaldyqqan naýqastar sany edáýir azaıǵan.