Jarysty uıymdastyrýshylardan arnaıy shaqyrtý alǵan B.Jýkaev ekinshi aınalymda osy dodanyń 4-raketkasy, aýstralııalyq Djeıson Kýblermen kezdesti. Aqtaý tennıs mektebiniń túlegi, 20 jastaǵy Beıbit Jýkaev 1:6, 7:6 (11:9), 7:5 esebimen jeńiske jetti. Úsh saǵat 32 mınýtqa sozylǵan asa tartysty matchta Beıbit 11 eıs, 2 breık jasady. Qarsylasy, 28 jastaǵy D.Kýbler 6 eıs, 4 breıkke qol jetkizdi.
«Tájirıbeli tennısshini jeńgenime qýanyshtymyn. Búgin aýa raıy qolaıly bolmaı, kúshti jel kedergi jasady. Ekinshi partııada soǵan beıimdelip, dopty jaqsy bere aldym. Djeıson da keremet oınady. Degenmen óz josparymdy aıaǵyna deıin júzege asyra bildim», dedi B.Jýkaev.
Qazaqstandyq tennısshi jartylaı fınalǵa ótý úshin reseılik Petr Bırıýkovpen saıysqa túsedi.
