M.Ahmetjanovtyń aıtýynsha, qazirgi ýaqytta Agenttik «Atameken» UKP-men birlesip konkýrstar boıynsha satyp alý baǵasyna monıtorıng jáne taldaý júrgizip jatyr.
«Mysaly, Batys Qazaqstan oblysy Kaztalov aýdanynyń ákimdigi 30 mln. teńgege páter satyp alýdy josparlady. Páterdiń aýdany – 40-60 sharshy metr. Mundaı baǵalar tipti elordada da joq. Bizdiń usynysymyz boıynsha baǵa 6 esege tómendep, 5 mln teńge boldy», dedi ol.
Sondaı-aq, ol ótken jyly 40 mlrd teńge artyq shyǵyn anyqtalsa, bıylǵy jyldyń birinshi jartyjyldyǵynda 36 mlrd teńge anyqtalǵanyn aıtty.
«Biz kórsetkishtiń ósýin jetistik dep aıtamyz, biraq is júzinde bul problemalyq sıgnal. Baǵany kóterý – aldaǵy ýaqytta para alý men qaıtarý úshin alǵashqy qadam», dep atap ótti Antıkor basshysy.
Bul máseleni sheshý úshin Agenttik memlekettik josparlaý jáne memlekettik satyp alý portaldaryn biriktirýdi, bıýdjettik ótinimderdi ornalastyrýdyń jarııalylyǵyn, birtekti taýarlar úshin biryńǵaı erekshelik pen baǵany belgileýdi, sondaı-aq bıýdjet qarajatyn bólýden bastap ıgerýge deıin súıemeldeýdi engizgen.
M. Ahmetjanovtyń aıtýynsha, bul bastamalardyń barlyǵyn memleket basshysy qoldaǵan. Qazir úkimet tıisti shara qabyldap jatyr.
