«Mektep — balalar ózin qaýipsiz sezinetin, al ata-analar balasy úshin alańdamaıtyn oryn bolýy kerek. Pandemııa oqytý formatyn onlaın rejımge kóshýge májbúr etti. Muǵalimder tarapynan jedel sharalar qabyldanǵanyna qaramastan dástúrli, ıaǵnı oflaın formattaǵy oqytýǵa eshnárse jetpeıdi.
Qyrkúıek aıynda mektepterdi qalypty oqytý formatyna kóshirý úshin muǵalimderdi de, ózge de mektep qyzmetkerlerin vaksınasııalaý qajet. Bul densaýlyqty qorǵaýǵa, ınfeksııany toqtatýǵa jáne koronavırýstyń jappaı taralýyn shekteýge kómektesedi», dep jazdy elorda ákimi.
Qala ákiminiń aıtýynsha, qazirgi ýaqytta mektep muǵalimderiniń 85%-y vaksınasııalanǵan. Mysaly, №3, №7, №13, №21, №33, №34, №39, №46, № 81 mektep-gımnazııalary 100% ımmýndaýdan ótken.
«Pedagogterdyń barynsha jaýapkershilik tanytqany qýantady. Degenmen, birqatar oqý ornynda vaksınasııalanǵandar paıyzy áli de tómen. Muǵalimdermen (mektepter/kolledjder) onlaın rejımde jańa oqý jylyna daıyndyq máseleleri talqylandy.
Sońǵy kúnderi qalamyzda ınfeksııa juqtyrǵandar sany artýda. Qosymsha juqpaly aýrýlar stasıonarlaryn ashyp jatyrmyz. Táýlik saıyn 300-ge jýyq naýqas aýrýhanaǵa jatqyzylady. Dárigerler atap ótkendeı ınfeksııa juqtyrǵandar qatary koronavırýstyń jańa shtamynyń paıda bolýyna, ıaǵnı «Delta shtamyna» (úndi shtamy degen ataýmen belgili) baılanysty bolyp otyr. Bul — koronavırýstyń asa qaýipti túri, jyldam taralyp, tez juǵady.
Qalada 100 vaksınasııalaý pýnkti jumys isteıdi, sondaı-aq egý oryndary SOO-larda, SÚ-lerde jáne t.b. oryndarda bar. Qazir 286 myńǵa jýyq adam vaksınasııalandy. Sońǵy aptalarda vaksına alǵysy keletinder sany 7 esege deıin ósti. Bul bizdi qatty qýantady. О́z densaýlyǵyńyzdy jáne aınalańyzdaǵy adamdardyń densaýlyǵyn qorǵaý úshin vaksına alý qajet. Osylaısha ujymdyq ımmýnıtet qalyptasady», dep jazdy elorda ákimi.
