10 týr boıy shashasyna shań juqtyrmaı, jalpy esepte jeke-dara kósh bastap turǵan Slovenııanyń jas juldyzy Mıýre men Sen-Ları-Sýlan aralyǵyndaǵy saıysta aldyna jan salmady. 178,4 shaqyrymdyq qashyqtyqty Pogachar 5 saǵat 03 mınýt 31 sekýndta júrip ótti. Ekinshi jáne úshinshi oryndardy danııalyq Ionas Vıngegor («Team Jumbo-Visma») men ekvadorlyq Rıchard Karapas («INEOS Grenadiers») ıelendi. Kezeń jeńimpazynan úsh mınýtqa jýyq ýaqyt qalyp qoıǵan «Astananyń» serkesi Alekseı Lýsenko 12 satyǵa taban tiredi.
Taýly aımaqtaǵy jeńisinen keıin Tadeı Pogachar ózge qarsylastarynyń barlyǵynan qara úzip ketti. Onyń kórsetkishi – 71:26:27. Slovenııalyq veloshabandozdy ókshelep kele jatqan Ionas Vıngegor odan baqandaı 5 mınýt 39 sekýnd qalyp keledi. Al qazaqstandyq sportshy Alekseı Lýsenko jalpy esepte segizinshi satyǵa syrǵyp tústi.
