Metallýrgter kúnine oraı «Kazzink» kompanııasy úsh jyl boıy «Izgi júrek» baıqaýy aıasynda ózgelerdi qutqarý úshin óz ómirin qaterge tikken eń batyl jáne erjúrek shyǵysqazaqstandyqtardy marapattady. Áleýmettik jelilerdegi paıdalanýshylar jaqyn adamyna ómirge qaýipti jaǵdaıda kómektesken áleýetti keıipkerlerdiń kandıdatýralaryn usynyp, ShQO TJ qoldaýymen qatysýshylar tizimi qurylady. Sońǵy kezeńde resmı saıtta daýys berý arqyly halyq súıiktisi atanǵan keıipkerler anyqtalady. Bıylǵy jyly fınalısterdiń qatarynda 3000-nan astam daýys jınaǵan polısııa qyzmetkerleri - Dıas Aǵzamov pen Azamat Ybyraıhanov bar.
Semeı qalasynyń eki polısııa qyzmetkeri túngi ýaqytta qyzmet atqarý barysynda Parhomenko kóshesi boıynda kúldiń sońynan erip kele jatqan qalyń tútindi baıqady. Tútin kózine qaraı baǵyt alyp, janyp turǵan úı tóbesin kórdi.
О́rt týraly 101-arnaǵa habarlap, tártip saqshylary órt sóndirýshilerdi kútpeı, dýal arqyly ótip, adamdardy ottan evakýasııalaýǵa asyqty. As úıdiń terezesi arqyly ishke kire salysymen alǵashqy adamdy taýyp, úıdegi adamdardyń naqty sanyn anyqtap, olarǵa shyǵýǵa kómektesti. Otbasylyq jupty jalynnan arbap, olardyń 18 jasar uly men 90 jastaǵy atasyn terezeden shyǵardy. Dıas Aǵzamov pen Azamat Ybyraıhanov kez kelgen sekýndta jarylý qaýipi bar eki gaz ballondy shyǵaryp úlgerdi.
Osy erligi úshin olar «Izgi júrek» marapatyna jáne «Kazzink» kompanııasynyń mıllıon teńgesine ıe boldy.
