Saýalnama maqsaty – halyqtyń kóńilinen shyǵatyn-shyqpaıtyn qyzmet túrlerin anyqtaý, sondaı-aq qazaqstandyqtardyń tutynýshy quqyǵyn qanshalyqty biletinin saralaý. Shara barysynda respondentter saýda men qyzmettiń 20 salasyn baǵalady.
Nátıjesinde azamattardyń tutynýshylyq quqyǵy únemi buzylatyn bes sala anyqtaldy.
Bul tizimde medısınalyq qyzmetter kósh bastap tur. Tutynýshylardyń 45,9%-y kórsetiletin qyzmet sapasyna qanaǵattanbaıdy. Ekinshi sala - temirjol kóliginiń qyzmetteri. Oǵan 43,2% respondenttiń kóńili tolmaıdy. Al qalaaralyq/halyqaralyq avtomobıl, onyń ishinde taksı qyzmetiniń jumysyn adamdardyń 42%-y nashar dep belgilegen. Sondaı-aq bilim berý ortalyqtarynyń qyzmeti 41,6% tutynýshynyń oıynan shyqpaǵan. Bestikti baılanys qyzmeti aıaqtaıdy. Oǵan respondentterdiń 35,9%-y qanaǵattanbaıdy.
Týrıstik sala, qoǵamdyq tamaqtaný, TKSh jáne basqa da salalarǵa qatysty shaǵymdar da az emes. TQQK-ge qurylys uıymdarynyń atyna shaǵymdar túsken joq. Olar QR Indýstrııa jáne ınfraqurylymdyq damý mınıstrliginiń Qurylys jáne turǵyn úı-kommýnaldyq sharýashylyq isteri komıtetine tikeleı jiberiledi. Ol qurylys salasynyń barlyq máselesin qaraıdy.
Respondentterdiń 67,5%-y tutynýshy quqyǵyn qorǵaýdy retteý salasynda bári jaqsardy dep sanaıdy.
Zertteý qorytyndysy boıynsha Komıtet birqatar usynys ázirledi. Atap aıtqanda, memlekettik organdarǵa tutynýshy quqyǵyn qorǵaýdyń barlyq baǵytynda túsindirý jumysyn kúsheıtý jáne mektep, kolledj, JOO-larda, tutynýshylar arasynda tutynýshy saýattylyǵyn oqytý usynyldy.
Saýalnama nátıjesi zańnamalyq reformalardy jalǵastyrý qajet ekenin kórsetti. Atap aıtqanda, 2021 jyly «Tutynýshylardyń quqyqtaryn qorǵaý týraly» Zańǵa túzetýlerdiń 2-paketin ázirleý bastaldy.
Aıta keteıik, atalǵan saýalnama 2020 jylǵy shilde men qazan aralyǵynda júrgizilgen.
