El Táýelsizdiginiń 30 jyldyq mereıtoıyn merekeleýge daıyndyq maqsatynda elordada 800-den astam túrli formattaǵy is-sharalardy qamtıtyn biryńǵaı qalalyq jospar quryldy. Onyń ishinde 80-nen astamy – halyqaralyq jáne respýblıkalyq deńgeıde, 700-den astamy – qalalyq jáne aýdandyq deńgeıde.
«Jastar arasynda sportty nasıhattaý, óskeleń urpaqty salaýatty ómir saltyna tárbıeleý maqsatynda qala ákimdigi Táýelsizdiktiń 30 jyldyǵyn merekeleý aıasynda birqatar respýblıkalyq jáne qalalyq sporttyq is-sharalar ótkizdi. Sondaı-aq qala turǵyndaryn buqaralyq sportqa tartý úshin birqatar sport nysandary ashyldy: Boks ortalyǵy, Kórkem gımnastıka ortalyǵy jáne Jekpe-jek zaly, sol sııaqty elordanyń eldi mekenderinde dene shynyqtyrý-saýyqtyrý keshenderi (О́ndiris, Kóktal eldi mekenderindegi DSK), 2 jaýyngerlik óner ortalyǵy», dep habarlady Dáýren Babamuratov.
Sonymen qatar el Táýelsizdiginiń 30 jyldyǵyna oraı elordanyń mádenıet mekemeleri oflaın jáne onlaın rejımde arnaıy taqyryptaǵy konserttik baǵdarlamalar, spektaklder, qoıylymdar, shyǵarmashylyq keshter, kórmeler jáne ekskýrsııalar ótkizedi.
Basqarma basshysynyń aıtýynsha maýsym-shilde aılarynda Nur-Sultanda QR Memlekettik rámizderi kúni, Medısına qyzmetkerleri kúni, Qazaqstan polısııasy kúni jáne Elorda kúni sııaqty merekelerge arnalǵan 200-den astam túrli is-shara ótkizildi.
«Bıyl Elorda kúnin merekeleý áleýmettik jobalarǵa arnaldy jáne tek áleýmettik sıpatqa ıe boldy. Osylaısha, halyqtyń áleýmettik osal toptary arasynda kezekte turǵandarǵa páter kilti tapsyryldy, qurylysy uzaqqa sozylǵan 20 úı aıaqtaldy, О́ndiris jáne Kóktal eldi mekenderinde iri dene shynyqtyrý-saýyqtyrý keshenderi paıdalanýǵa berildi.
Sonymen qatar kórý qabileti buzylǵan balalarǵa arnalǵan mamandandyrylǵan balabaqsha ashyldy, 50-den astam aýlanyń, 10-ǵa jýyq qoǵamdyq keńistiktiń qurylysy aıaqtaldy», dedi basqarma basshysy.
Budan bólek, elordada qazaq halqynyń belgili tulǵalary — Dına Nurpeıisovaǵa, Qanysh Sátpaevqa, Álıhan Bókeıhanǵa, Ahmet Baıtursynulyna jáne Mirjaqyp Dýlatulyna eskertkishter ornatyldy. Sondaı-aq Táýelsizdik mereıtoıyna oraı Nur-Sultanda «Qutqarýshylar saıabaǵy» ashyldy.
Jyl sońyna deıin qalada Qazaqstan Táýelsizdiginiń 30 jyldyǵyna arnalǵan júzdegen sporttyq, mádenı, ǵylymı-tanymdyq, qaıyrymdylyq is-sharalary ótkiziledi. Bul jaǵdaıda sanıtarlyq normalar men shekteý sharalary qatań saqtalady.
