1992 jyldan beri Vıtebskide dástúrli túrde ótetin óner dodasy qanshama ónerpazdyń juldyzyn jaqty. Ásirese elimiz úshin aıtýly merekege aınalǵany jasyryn emes. Tipti sheteldikter búginde «Slavıan bazary» baıqaýyn «Qazaq bazary» dep ózgertý kerek dep ázildeıdi eken. Tereńnen oılaǵan janǵa munyń ózi el úshin úlken mártebe.
Alǵashqy bolyp sóz tizginin alǵan Mádenıet jáne sport vıse-mınıstri Nurǵısa Dáýeshov Rýhııanyń jeńisi – Táýelsizdigimizdiń 30 jyldyǵyna arnalatynyn tilge tıek etti.
«Osy jerde Mádenıet jáne sport mınıstri Aqtoty Raıymqulovanyń atynan arnaıy alǵysymyzdy bildirgimiz keledi. Jeńistiń joly qashanda aýyr. Sizdiń shyǵarmashylyq izdenisińiz, erekshe talantyńyz álemdi tańǵaldyrdy. Bul – memleketimizdiń abyroıy. О́ner salasynda qandaı da bir báıge bolsyn, qanjyǵamyz bos qaıtqan emes. Ásirese, «Slavıan bazarynda». Keshe Memleket basshysy Qasym-Jomart Toqaev ta áleýmettik jeli arqyly jeke quttyqtaýyn joldady. Qazaq qyzynyń top jarýy táýelsiz elimizdiń jastaryn jigerlendiretinine senim mol. Oǵan qosa jeńisti jalǵap, balalar arasyndaǵy baıqaýda da bizdiń Amına Ashatqyzy da dıplomat atandy. Bul da úlken dáreje», dedi N.Dáýeshov.
Vıse-mınıstrdiń aıtýynsha, aldaǵy ýaqytta óner ıesiniń budan da úlken sahnalardy baǵyndyrýyna jaǵdaı jasalady. Bul sózdi «Qazaq ulttyq mýzyka akademııasynyń» rektory Aıman Musaqojaeva da qoldady.
«Bizdiń shákirtimiz 7 jyl boıy úzbeı izdenýdiń nátıjesinde eldiń mártebesin asqaqtatty. Ustazdardyń eńbegi kól-kósir. Ony aıtpaı ketkenimiz bolmas. Rýhııa – jańa juldyz. Qazaq estradasyn jańa beleske kóteretinine senimdimiz. Aldaǵy ýaqytta Norvegııada Qazaqstannyń mádenıet kúnderi ótedi. Buıyrsa, sol sharada Rýhııa da óner kórsetedi. Odan da basqa jas ánshiler búginde álem sahnasyn baǵyndyryp júr. Búginde elimizdiń mádenı jetistikteri kóńilge qýanysh uıalatady», dedi A.Musaqojaeva.
Baspasóz máslıhaty barysynda «Habar» telearnasynyń dırektory Dınara Bısembına baıqaýdyń tikeleı efırden kórsetilýi ult úshin úlken maqtanysh ekenin jetkizdi. Aldaǵy ýaqytta da halyqaralyq óner festıvalin kórermenge der kezinde usynyp, halyqtyń jeńisti sáttiń kýágeri bolýyna jol ashatynyna ýáde etti.
Odan keıin Rýhııa Baıdúkenovanyń ózi sóz alyp, el-jurtyna izgi iltıpatyn bildirdi.
«Men ánshi bolýdy bala kúnimnen armandaıtynmyn. Tipti tuǵyrǵa qonǵan sátti halyqpen birge toılasam dep te qııalǵa shomǵan kezderim bolǵan. Armanym aldamapty. Bul – meniń ǵana emes, sizderdiń de jeńisterińiz. Shyny kerek, 3 jyl qatarynan irikteýge qatystym. Alǵashynda qazylar alqasy aryqtaýymdy talap etti. Ol kezde 95 kılogramm bolatynmyn. Solaı súrindim. Ekinshi joly juldyzym janbady. Qansha tyrysqanymmen baıqaýǵa joldama ala almadym. Sodan úmitim úzilip, bıyl barmaı-aq qoısam ba dep oılaǵanmyn. Biraq Dımash Qudaıbergenniń ózi qolqalady. Meni irikteýge jetektep aparǵandaı boldy. Bul maǵan úlken senim berdi. Qazylar alqasynyń múshesi, halyq ártisi Roza Rymbaevanyń kózi maǵan tústi. Birden meniń laıyq ekenimdi aıtyp, arqama qanat bitirgendeı kúıge bóledi», deıdi R.Baıdúkenova.
О́nerpaz mektep tabyldyryǵyn attaǵan sátten bastap vokalmen aınalysyp keledi eken. О́ziniń týyp-ósken jeri Taldyqorǵan qalasyndaǵy óner mektebinde Serikjamal Núsipqyzynan 7 jyl sabaq alǵan. Ustazynyń únemi qasynan qalmaı, bar bilgenin boıyna sińirgen. Sóıtip 15 jasynda Qazaq ulttyq óner ýnıversıtetiniń kolledjine túsedi. Búginde sol bilim ordasynyń 3-kýrs stýdenti.
Brıfıngte «Slavıan bazary» halyqaralyq óner festıvaliniń eldegi resmı ókili Qarlyǵash Ábdikárimova jerlesiniń jeńisine shúbá keltirmegenin aıtady. Ol 20 jyldan beri baıqaýdyń ishinde júrgennen keıin, ózi topqa qosar túlektiń qarym-qabiletin, shyǵar bıigin alystan ańdaıtyn bolǵan.
«Bizdiń árbir qatysýshymyz sahnadan túskenge deıin ýaıymdap júremin. Árıne, ózińniń balalaryńnyń jaqsy óner kórsetkenin qalaısyń. Bizdiń utqan jerimiz, irikteýdi ádil ótkizip, eń myqty júırikti tańdaǵanymyz. Rýhııa negizgi qarsylasynan jalpy esepte 4 upaı joǵary boldy. Bul – ońaı sharýa emes. Ondaǵy kórermender talǵampaz, kimniń kim ekenin, onyń talabyn birden ańǵaryp qoıady. Menińshe, Rýhııa jergilikti kórermenniń esinde qalary anyq», dedi Q.Ábdikárimova.
Eń ǵajaby, baıqaý barysynda Dımashtyń jankúıerleri Rýhııaǵa jaqtasqan eken. Doda bastalmas buryn, túski tamaqqa ánshi qyz kóje ishkisi keledi. Sebebi uıymdastyrýshylar usynǵan mázir onyń kóńilinen shyqpasa kerek. Muny estigen Dımashtyń jankúıerleri jınalyp, qazaqtyń qyzyna arnaıy kóje ázirleıdi. Mundaıdy kútpegen óner ıesi tosylyp qalady. Qazaqtyń atyn álemge shyǵarǵan Dımashty qaı jerde de qoldaıtyn osyndaı shynaıy jankúıerleri baryna rızashylyǵyn bildiredi. Olardyń barlyǵy qazaqtyń kók Týyn ustap, baıqaý boıy Rýhııany qoldaǵan kórinedi.
Baspasóz sońynda «Slavıan bazary-2021» baıqaýynyń jeńimpazy Rýhııa Baıdúkenova ata-anasyna, Mádenıet jáne sport mınıstri Aqtoty Raıymqulova, Almaty oblysynyń ákimi Amandyq Batalovqa jáne qoldaý bildirgen barsha halyqqa iltıpatyn bildirdi.
