Pavlodar oblysynda qarly burqasynnyń bastalǵanyna ekinshi táýlik boldy. Osyǵan oraı kommýnaldyq sala mekemeleri kúsheıtilgen daıyndyqqa kóshti. Bul týraly «Habar» telearnasy habarlady.
Halyqaralyq mańyzy bar joldar qardan tazartylyp, kólikterdiń júrýine múmkindik jasaldy. Ázirge jyl basynan beri jolǵa qatysty oqys oqıǵa tirkelgen joq. «Qazir jekelegen aımaqtarda jel turyp, onyń arty qarly burqasynǵa ulasýda. Bizdiń aımaqta da osyndaı jaǵdaıdy bastan keshirip otyr. Jekelegen tehnıkalardyń eskirgenine qaramastan, respýblıkalyq mańyzy bar 141 shaqyrym joldyń qaýipsizdigin qatań baqylaýǵa aldyq», deıdi Pavlodar oblysy boıynsha joldarǵa qyzmet kórsetý bóliminiń jetekshisi Sergeı Omarov.
Aýa raıyn boljaıtyn mamandar osy aptanyń aıaǵyna deıin jekelegen oblystarda burqasyn bolýy yqtımal ekenin aıtýda. Sonyń ishinde joǵaryda atalǵan óńir de bar. Biraq, osyndaǵy mamandar jolaýshylar úshin qaýipsizdik sharalaryn qatań baqylaýda ustaıtynyna senim bildirip otyr. Osy rette derekke júginsek, qys bastalǵaly oblys ortalyǵynan 250 myń tekshe metrden astam qar syrtqa shyǵarylǵan eken.
Danııar Túımebaı.
Derekkóz: «Habar» telearnasy
Foto: «Habar» telearnasy.
