Memleket basshysynyń tapsyrmasy aıasynda, QR Eńbek jáne halyqty áleýmettik qorǵaý mınıstrligi, múgedektigi bar adamdarǵa qatysty kemsitýshilikti joıýǵa baǵyttalǵan «Múgedekterdiń quqyqtary týraly konvensııaǵa Fakýltatıvtik hattamany ratıfıkasııalaý týraly» zań jobasyna qatysty jumys júrgizýde.
Bul qujat Qazaqstan 2015 jylǵy 20 aqpanda ratıfıkasııalaǵan BUU Múgedekterdiń quqyqtary týraly konvensııasyna qosymsha kelisim bolyp tabylady.
Konvensııaǵa sáıkes, ony ratıfıkasııalaǵan memleketter múgedektigi bar adamdardyń jetkilikti ómir súrý deńgeıin qamtamasyz etý jáne olardy áleýmettik qorǵaý úshin barlyq sharalardy, onyń ishinde zańnamalyq sharalardy qabyldaýy tıis.
Qazirgi ýaqytta zań jobasy memlekettik organdarda kelisý rásiminen ótýde.
«Fakýltatıvtik hattamany ratıfıkasııalaý Qazaqstan Respýblıkasynyń azamattaryna ózderiniń ekonomıkalyq, áleýmettik jáne mádenı quqyqtaryn halyqaralyq qorǵaýǵa quqyq beredi. Hattama Konvensııada bekitilgen osy quqyqtar buzylǵan jaǵdaıda jeke shaǵymdardy qaraý tetigin belgileıdi. Osyǵan uqsas tetikter Azamattyq jáne saıası quqyqtar týraly halyqaralyq paktide, Áıelderge qatysty kemsitýshiliktiń barlyq túrin joıý týraly konvensııada jáne Násildik kemsitýshiliktiń barlyq túrin joıý týraly konvensııada kózdelgen», dep atap ótti QR eńbek jáne halyqty áleýmettik qorǵaý vıse-mınıstri Erlan Áýkenov.
Fakýltatıvtik hattamany ratıfıkasııalaý kezinde taraptar BUU janyndaǵy Múgedektigi bar adamdardyń quqyqtary jónindegi komıtettiń Konvensııa boıynsha óz quqyqtarynyń buzylǵanyn málimdeıtin jekelegen adamdardyń nemese toptardyń shaǵymdaryn qaraý quzyretin tanýǵa kelisedi. Komıtet qatysýshy memleketten aqparat surata alady jáne oǵan usynymdar bere alady. Budan basqa, taraptar Komıtetke Konvensııada bekitilgen quqyqtardyń «eleýli nemese júıeli buzylýyn» tekserýge, olar týraly habarlaýǵa jáne usynymdar berýge ruqsat etýi múmkin.
Zań jobasyn qabyldaý teris áleýmettik-ekonomıkalyq jáne quqyqtyq saldarǵa ákep soqtyrmaıdy, sondaı-aq respýblıkalyq bıýdjetten qosymsha qarjylyq shyǵyndardy talap etpeıdi.
Eske sala ketsek, 2006 jylǵy 13 jeltoqsanda, barlyq múgedekterdiń barlyq adam quqyqtary men negizgi bostandyqtaryn tolyq jáne teń júzege asyrýyn kótermeleý, qorǵaý jáne qamtamasyz etý, sondaı-aq olarǵa tán qadir-qasıetti qurmetteýdi kótermeleý maqsatynda Múgedekterdiń quqyqtary týraly konvensııany jáne Múgedekterdiń quqyqtary týraly konvensııaǵa Fakýltatıvtik hattamany BUU Bas Assambleıasyqabyldaǵan bolatyn.
Qazirgi ýaqytta 97 memleket Konvensııaǵa qatysýshy bolyp tabylady, olardyń ishinde taıaý shet elder – Ázirbaıjan, Armenııa, Mońǵolııa jáne Ýkraına.
