Pıreneı túbeginde alaýy tutanǵan dúbirli doda buryndary KSRO-nyń qol astynda bolǵan «baýyrlas» respýblıkalardyń ókilderi sońǵy ret bir komandanyń týdyń astynda bas qosyp, TMD quramasynyń sapynda óner kórsetti. Soǵan qaramastan olar sol jarysta 112 (45 altyn+38 kúmis+29 qola) medaldi ıelenip, jalpy komandalyq esepte kezekti ret kósh bastady. AQSh (37+34+37) ekinshi oryndy ıelense, Germanııa (33+21+28) úzdik úshtikti qorytyndylady.
TMD quramasynyń bıik tuǵyrdan kórinýine Qazaqstannyń da sportshylary da ózindik úles qosty. Solardyń arasynan altynnan alqa taǵynǵan basketbolshy Irına Gerlıs, kúmispen kúptelgen voleıbolshy Elena Chebýkına men Tatıana Menshova jáne qola medaldi moıyndaryna ilgen grek-rım kúresi sheberi Dáýlet Turlyhanov pen syryqpen sekirýshi Grıgorıı Egorovty bóle-jara ataýǵa bolady.
Al Barselona Olımpıadasynyń naǵyz qaharmany Vıtalıı Sherbo ekeni daýsyz. Sporttyq gımnastıkany serik etken 20 jastaǵy Belarýs eliniń ókili ózi baıraqty báseke barysynda alty ret altyn tuǵyrdan qol bulǵady.
