Kezdesý barysynda Qasym-Jomart Toqaev Qazaqstan men Reseı Federasııasy arasyndaǵy strategııalyq jáne odaqtastyq qatynastardyń qarqyndy damyp kele jatqanyn atap ótti. Osy rette О́ńiraralyq yntymaqtastyq forýmy tıimdi dıalog alańyna aınalyp otyr.
Qazirgi ýaqytta Atyraý, Batys Qazaqstan, Mańǵystaý jáne Qazaqstannyń ózge de oblystary Astrahan oblysymen kóptegen baǵyt boıynsha ózara tıimdi kooperasııany júzege asyrýda. Ekonomıkalyq belsendiliktiń jańǵyrýyna oraı shekara mańyndaǵy saýda qarqyny birtindep qaıta qalpyna kelip jatqany baıqalady.
Qazaqstan men Astrahan oblysynyń arasyn negizgi baılanystyrýshy retinde sol jerdegi kóp shoǵyrlanǵan qazaq dıasporasy mańyzdy ról atqaryp otyr.
Prezıdent Astrahan qazaqtarynyń tarıhı otanymen rýhanı baılanystaryn nyǵaıtýyna, ata-babalarynyń tili men mádenıetin saqtaýyna jan-jaqty qoldaý kórsetip jatqany úshin Igor Babýshkınge rızashylyǵyn bildirdi.
Memleket basshysy qazaq halqynyń Bókeı han, Qurmanǵazy, Dına Nurpeıisova jáne basqa da uly perzentteriniń esimin Astrahan jerinde ulyqtap kele jatqany úshin aımaq ákimshiligi men turǵyndaryna alǵys aıtty.
