Sol kezderi Djordjııa shtatynyń ortalyǵynda XXVI jazǵy oıyndar dúrkirep turyp ótip jatty. Al 27 shildede Olımpıada qozǵalysynyń 100 jyldyq mereıtoıyn atap ótý úshin sań myń adam saıabaqta jınaldy. Dál sol kezde jarylys bolyp, sonyń saldarynan eki adam kóz jumdy. Taǵy 111-i túrli dene jaraqattaryn alyp, aýrýhanaǵa tústi. Eger sol mańdaǵy kúzetshileridiń biri Rıchard Djýella qyraǵylyq tanytpaǵanda japa shekkenderdiń sany áldeqaıda kóp bolatyn edi. Ol saıabaqtaǵy oryndyqtyń biriniń astynda kúdikti zatty baıqaǵany týraly polısııaǵa habarlaıdy. Oqıǵa ornyna dereý jetken arnaıy mamandar halyqtyń birazyn oqshaýlandyryp úlgeredi. Biraq bomba báribir jarylady.
Quzyrly organdar alǵashynda kúdiktilerdiń biri retinde Djýellany ábden tergep, biraz jyl áýre-sarsańǵa salady. Keıinnen ol aqtalyp shyqqanymen, joǵarydaǵy jaǵdaı jazyqsyz jazalanǵan jannyń júregin qatty jaralaıdy. Onsyz da densaýlyǵy nashar Rıchard 2007 jyldyń 29 tamyzynda qaıtys boldy. Ol nebary 44 jasta edi...
Al qylmyskerdiń ózi 2003 jyly tutqyndalady. Onyń aty-jóni – Erık Robert Rýdolf. Tártip saqshylarynyń qolyna túskenge deıin ol AQSh-tyń ońtústik aımaqtarynda taǵy úsh jarylys uıymdastyryp úlgeredi. Qylmysy tolyqtaı dáleldengennen keıin aıtýly terrorıst ómir boıy temir torǵa toǵytylady.
