Bıyl aımaqta adamdardy zańsyz bostandyǵynan aıyrý, quldyqqa salý syndy zańsyzdyqtar men azamattardyń quqyqtarynyń shektelý derekteri tirkelmegen. Bul baǵyttaǵy zańsyzdyqtardy anyqtaý úshin oblys kóleminde tirkelgen 3 106 sharýa qojalyqtyń 2 660-na tekserý jumystary júrgizildi.
«Jyl basynan adam saýdasyna qatysty 2 habarlama tústi. Sonyń biri, «Evrazııa» telearnasy arqyly jańalyqtan «Balalar 500 myń teńgeden satylyp jatyr» degen suhbat boıynsha tekserý jumystary júrgizildi. Atalǵan aqparat jalǵan bolyp shyqty. 30 naýryzda memlekettik emes uıymnan Qyzylorda qalasyndaǵy qurylys nysandarynyń birinde jumys istep júrgen О́zbekstan Respýblıkasynyń azamattaryn májbúrli eńbekke tartylǵany týraly habarlandy.
Búginde qylmystyq is tirkelip, tergep tekserý amaldary júrgizilýde. Qurylys nysanynan anyqtalǵan 14 ózbek azamaty Qyzylorda oblysynyń áleýmettik–psıhologııalyq, quqyqtyq qoldaý ortalyǵy úkimettik emes mekemesine ornalastyryldy», dedi OPD krımınaldyq polısııa basqarmasynyń bólim bastyǵy Ǵanı Muqanov.
Al aımaqta adam saýdasyna qatysty qylmystyq isterdiń eń kóbi jeńgetaılyqpen aınalysqandar arasynda. Osy jaǵdaıǵa baılanysty bıyl 10 derek tirkelip, 2 tulǵa jáne jeńil júrispen paıda taýyp júrgen 14 azamatsha esepke alyndy. Sondaı-aq bala satýmen aınalysqan 1 derek, jezókshelikpen aınalysýǵa tartý boıynsha 2 derek anyqtalǵan.
